Mót­mæla heim­sókn Ursulu von der Leyen

Greint var frá því í dag að von der Leyen kæmi í opinbera heimsókn og myndi dvelja á Íslandi dagana 16. til 18. júlí. Á meðan dvölinni stendur mun hún funda með Kristrúnu Frostadóttur forsætisráðherra og Þorgerði Katrínu Gunnarsdóttur utanríkisráðherra.

Tilgangur heimsóknar framkvæmdastjórans er til að ræða stöðu alþjóðamála, öryggis- og varnarmála, viðskiptamála, almannavarna og loftslagsmála.

Félagið Ísland-Palestína segir hins vegar að von der Leyen hafi í starfi sínu „tekið virkan þátt í helför Ísraels í Palestínu með ítrekuðum stuðningsyfirlýsingum við Ísrael.“ Þá hafi hún „haldið diplómatískum hlífðarskildi yfir Ísrael og komið í veg fyrir að Evrópusambandi beiti viðskipta- og vopnasölubanni gegn Ísrael“. 

Félagið vill að íslensk stjórnvöld kalli eftir því „að Ursula Von Der Leyen verði send til dómstóla í Haag“ en ekki boðið í skoðunarferð til Þingvalla.

Í tilefni af heimsókninni boðar félagið til mótmæla við Austurvöll á morgun, mánudaginn 14. júlí, klukkan 14 „þar sem Alþingi er að ljúka störfum án nokkurra aðgerða þingsins til að sporna við þjóðarmorðinu“. Þar ætlar félagið að mótmæla „fullkomnu aðgerðarleysi ráðamanna á Íslandi gegn þjóðarmorði Ísraels á Gaza og heimsókn Ursulu von der Leyen.“