„Kom hvergi nærri sam­ræði hans við barn­unga stúlkuna“

Þetta kemur fram í Facebook-færslu Gunnars Smára frá því um tíuleytið þar sem hann bregst við færslu Karls Héðins sem birtist um fimmleytið í dag. 

Karl opinberaði þar ástarsamband sitt við sextán ára austurríska stúlku árið 2017 þegar hann var sjálfur 22 ára. Sambandið varð til þess að Karl sagði sig úr stjórn Ungra Pírata árið 2017 en hann segist greina frá því nú vegna þess að Gunnar Smári hafi ýjað að því í opinberri umræðu og þrýst á Karl að greina frá því.

Gunnar Smári hafnar þessu og segist einungis hafa spurt Karl Héðin út í það hvers vegna hann sagði sig úr stjórn Ungra Pírata.

„Hann blandar mér í þessa frásögn í von um samúð“

„Eins og þið hafið kannski tekið eftir hef ég mátt þola linnulausa rógsherferð mánuðum saman frá Karli Héðini Kristjánssyni og Sæþóri Benjamín Randalssyni í undirbúningi þeirra að yfirtöku á Sósíalistaflokki Íslands. Og þótt þeir og áhangendur þeirra hafi náð kjöri í stjórnir flokksins hefur þessi herferð haldið áfram, enda fátt sem sameinar hópinn annað en heift og rógur. Og þessu ætlar seint að linna,“ skrifar Gunnar Smári í færslunni.

Gunnar segir Karl Héðin hafa skrifað sína útgáfu af því hvers vegna hann var beðinn um að segja sig úr stjórn Ungra Pírata fyrir nokkrum árum. Þar komi fram að formaðurinn hafi beðið Karl að segja af sér vegna „samræðis hans við barnunga stúlka á æskulýðsmóti“. 

„Og Karl Héðinn reynir að tengja mig við þessa atburði, lætur sem hann sé að segja frá nú vegna þess að ég hafi spurt hann um ástæður þess að hann hafi verið beðinn að segja sig úr stjórninni. Nú er það rétt, að ég spurði hann um ástæðurnar í kommenti á Facebook undir status hans um villimennsku og sósíalisma,“ skrifar Gunnar Smári.

„En ég var ekki í Pírötum, ekki í stjórn Ungra Pírata, ekki á æskulýðsmótinu og kom hvergi nærri samræði hans við barnunga stúlkuna. Hann blandar mér í þessa frásögn í von um samúð, eins og hann sé fórnarlambið í þessari sögu en ekki stúlkan.“

Rifjar upp annað mál

Gunnar Smári segist sambærilega atburðarás hafa farið af stað „þegar skjáskot af kynlífs-stefnumótasíðu voru birt í vor þar sem Sæþór Benjamín virtist vera að reyna að lokka barnungan dreng til kynlífsathafna“.

„Skjáskotin höfðu legið á Netinu í rúmt ár, en Sæþór hélt því samt fram að þau væru birt nú vegna þess að hann hefði verið kjörinn formaður framkvæmdastjórnar Sósíalistaflokksins. Sæþór hélt því líka fram að skjáskotin hefðu verið fölsuð til að koma á hann höggi vegna þessa starfs, þótt skjáskotin hefðu birst meira en ári áður en hann tók við starfinu,“ skrifar Gunnar Smári.

„Áhangendur Sæþórs hafi viljað tengja þetta mál við mig og mikinn meirihluta félaga í Sósíalistaflokknum sem eru ósáttir við nýja stjórn flokksins og hversu óhönduglega nýjar stjórnir stýra flokknum, látið í það skína að skjáskotin megi rekja til deilna innan flokksins.“

Gunnar Smári hvetur fólk til að láta það ekki eftir Sæþóri og Karli Héðni að færa vanda sína yfir á annað fólk. 

„Karl Héðinn verður að segja frá ástæðum þess að hann sagði sig úr stjórn Ungra Pírata án þess að reyna að koma einhverri sök á sinni hegðun yfir á mig. Og Sæþór verður að fjalla um sín mál án þess að halda því fram að þau séu hluta af pólitískum deilum, sem þau augljóslega eru ekki,“ skrifar Gunnar Smári.

Færslu Gunnars Smára má lesa í heild sinni hér að neðan: