Einu verslun Þing­eyringa lokað

Þessu greinir Morgunblaðið frá í morgun en Elísa Björk Jónsdóttir, sem rekur Hammonu, stendur vaktina ein stærstan hluta ársins. Hún segir reksturinn ganga vel á sumrin en að veturinn sé hark.

Ástæða þess að Hammonu verði lokað segir Elísa Björk þá að hún muni taka við nýju starfi sem henni bauðst í vega vinnu. Þar mun hún elda mat fyrir samstarfsfélaga sína á hærri launum en hún getur greitt sér í eigin rekstri, þar að auki fær hún meira frí. Elísa Björk er með stóra fjölskyldu og lítil börn.

Hún segist þó ekki ætla að flytja burt frá Þingeyri og segir fjölskylduna nýbúna að kaupa sér hús í plássinu.

Enginn hafi enn sem komið er sýnt áhuga á að taka við rekstri verslunarinnar. Elísa segist þó vonast til að það taki einhver við enda mikið högg fyrir bæjarfélagið að þar verði engin verslun. Hótelið á Þingeyri selur mat á kvöldin yfir sumartímann en annars þarf bærinn að stóla á Hammonu.

Skammt virðist vera stórra högga á mili sem dynja á Dýrfirðingum þessa stundina. Fiskeldisfyrirtækið Arctic Fish greindi nýlega frá því að það hygðist flytja þriðjung starfsgilda sinna úr Dýrafirði og yfir á Ísafjörð í um fjörutíu mínútna akstursfjarlægð. Fyrirtækið hefur hlotið gagnrýni fyrir þetta meðal annars af hálfu innviðaráðherra.