„Ég á ekki von á því að það vefjist fyrir ráð­herranum“

Samkvæmt núgildandi lögum um strandveiðar er það skylda Fiskistofu að stöðva strandveiðar þegar útlit er fyrir að leyfilegum hámarksafla, sem nú er 10 þúsund tonn, sé náð.

Atvinnuvegaráðherra hefur lagt fram frumvarp til laga sem ætlað er að tryggja 48 daga strandveiðitímabil, en í frumvarpinu er ákvæði sem kveður á um að vikið verði frá skyldu Fiskistofu að stöðva veiðar þegar heildarkvótinn klárast. Málið hefur ekki verið afgreitt á Alþingi, sem rætt hefur um breytingar á veiðigjöldum dögum saman og ekkert bólar á þinglokum.

„Við erum alveg rólegir yfir þessu“

Örn Pálsson, framkvæmdastjóri Landssambands smábátaeigenda, segir að strandveiðimenn séu alveg rólegir yfir þessu. Það sé skýr vilji ríkisstjórnarinnar að afgreiða þetta mál.

„Þó það dragist eitthvað aðeins að samþykkja þetta mál þá tel ég ekki að þetta muni hafa þau áhrif að það stöðvi veiðarnar á nokkurn hátt. Það er auðvitað vilji fyrir hendi að stöðva ekki strandveiðarnar og standa við þessa 48 daga,“ segir hann.

Örn bendir á að í fyrra hafi ráðherra bætt tvö þúsund tonnum af þorski við strandveiðikvótann með reglugerð.

Bjarkey Olsen Gunnarsdóttir, þáverandi matvælaráðherra, undirritaði reglugerðina sem jók heildarráðstöfun í þorski til strandveiða í 12 þúsund tonn í stað 10 þúsund tonna. Aukningin kom af skiptimarkaði, þar af 1.300 tonn af þorski sem fengust í skiptum fyrir heimildir á makríl.

Örn segir að það verði ekkert mál að undirrita sambærilega reglugerð, dragist það á langinn að samþykkja frumvarpið.

„Ég á ekki von á því að það vefjist eitthvað fyrir ráðherranum.“

Potturinn fari alls ekki í 17 þúsund tonn

Örn telur afar ólíklegt að heildarpotturinn í þorski fari í sextán eða sautján þúsund tonn í sumar, en hann á ekki von á því að júlí og ágúst gefi eins vel og maí og júní.

 „Það er oft erfiðara að róa í ágúst.“

„Svo hefur það sýnt sig í maí og júní, það er meiri ró yfir mönnum þegar þetta er tryggt í 48 daga. Menn eru að taka sér frí, á dögum þar sem menn tóku sér ekki frí í fyrra, þegar það er bræla og svona. Núna vita menn að þetta er út ágúst, og þá er öðruvísi mynstur á sókninni,“ segir Örn.