Fimm á­stæður þess að Ís­land vinni EM

EM kvenna í fótbolta hefst hér í Sviss á morgun þegar Ísland mætir Finnlandi, klukkan 16 að íslenskum tíma. Liðið mætir svo heimakonum á sunnudaginn og Noregi 10. júlí.

Tvö liðanna komast áfram í útsláttarkeppnina, í 8-liða úrslit og spila þar við lið úr B-riðli (Spánn, Portúgal, Ítalía eða belgíska sveitin hennar Elísabetar Gunnarsdóttur).

Í gær skoðuðum við málin með svartsýnum augum en hérna eru fimm ástæður fyrir því að Ísland muni slá í gegn á EM og jafnvel hreinlega fara alla leið:

1. Leikmenn í allra fremstu röð. Við eigum mögulega besta miðvörð heims í Glódís Perlu. Við erum með fljótasta leikmann síðasta Evrópumóts, Sveindísi Jane, sem getur brunað fram úr öllum og kastað yfir alla. Við erum með eina mest spennandi tíu mótsins í Karólínu Leu og langbesta markvörðinn á Ítalíu í vetur í Cecilíu Rán. Svona mætti áfram telja.
2. Spila bara við þær bestu. Leikirnir sem Ísland hefur verið að spila síðasta rúma árið hafa verið við bestu lið heims. Leikir við þjóðir eins og Bandaríkin, Kanada, Frakkland og Þýskaland hljóta að þroska liðið, eftir mikil kynslóðaskipti frá síðasta EM, og hafa líka sýnt að það er ekki eitthvað óbrúanlegt bil á milli Íslands og þeirra allra bestu.
3. Léttasti riðillinn. Höfum eitt á hreinu, það er enginn riðill á sextán liða EM léttur. En þökk sé magnaðri undankeppni Íslands, þar sem liðið endaði fyrir ofan Austurríki, fengu stelpurnar sæti í næstefsta styrkleikaflokki þegar dregið var í riðla. Sæti með Englandi, Danmörku og Ítalíu. Svo var dregið og þá fékk Ísland langslakasta liðið úr efsta flokknum, Sviss, sem fékk að vera þar sem gestgjafi. Nákvæmlega ekkert auðvelt í þessu en þessi riðill veitir tækifæri.
   
   Ef Ísland ynni það þrekvirki að enda efst í riðlinum gæti liðið svo mögulega sloppið við Spán í 8-liða úrslitum og fengið vel viðráðanlegan leik, eftir góða hvíld, um að komast í undanúrslitin. Þá eru bara tveir leikir í bikarinn. Tvö prósent? Það er alla vega séns.
4. Þjálfararnir þekkja þetta allt. Þorsteinn Halldórsson er mættur á sitt annað stórmót með Ísland, enn taplaus eftir EM 2022, og hans hundtryggi aðstoðarmaður Ásmundur Haraldsson er á sínu þriðja móti eftir að hafa einnig aðstoðað Frey Alexandersson 2017. Þeir þekkja því allt sem viðkemur því að taka þátt í svona móti sem hlýtur að hjálpa helling til í öllum undirbúningi og þegar í leikina sjálfa kemur, og vita hvað upp á vantar frá fyrri mótum.
5. Þær eru víkingar. Ókey, þetta er klisja en þetta er líka staðreynd. Það er ekkert lið á þessu móti að fara að berjast af sama óbilandi krafti og eljusemi eins og Ísland. Stelpurnar unnu flestar tæklingar á síðasta Evrópumóti og það er engin tilviljun. Það þarf ekkert að skora mörg mörk til að vinna svona mót, ef liðið berst nógu grimmilega og heldur andstæðingnum í skefjum. Þær eru með geggjaða liðsheild, leyfi mér að fullyrða þá bestu á mótinu, og með stemninguna með sér í liði eru Íslendingar oft ósigrandi.

Við þetta mætti svo vonandi bæta að íslenskir stuðningsmenn gætu gert gæfumuninn. Þeir hafa svo sannarlega verið magnaðir á mótum í gegnum tíðina. En stemningin á síðasta heimaleik liðsins fyrir EM, gegn Frökkum á endurbættum Laugardalsvelli í byrjun júní, var samt ekkert frábær og kannski ekki víst að þarna sé hægt að tala um forskot á önnur lið.