Einungis á­fengi í boði hjá Heimkaupum

„Það er rétt. Við erum aðeins að fara yfir reksturinn og með samrunanum við Samkaup erum við aðeins að endurskipuleggja okkur og úrvalið. Við ætlum að setja fókusinn á þetta og bæta í úrvalið þar,“ segir Gréta María Grétarsdóttir, forstjóri Heimkaupa, í samtali við fréttastofu en RÚV greindi fyrst frá.

Samkomulag á milli Samkaupa og Heimkaupa náðist í desember 2024. Í kjölfarið var tólf starfsmönnum Heimkaupa sagt upp og sagði Gréta það vera vegna skipulagsbreytinga í fyrirtækinu vegna tap á rekstri vefverslunarinnar. Samruninn var samþykktur af samkeppnisyfirvöldum í apríl.

Heimkaup hóf sölu á áfengi árið 2022 en fyrir samrunann við Samkaup sá fyrirtækið um rekstur verslananna 10-11, Prís og Extra auk þriggja verslana á þjónustustöðvum Orkunnar.