Læra af reynslunni og leyfa vatnspásur í hitanum á Wimbledon

Wimbledon mótið hófst í morgun og mun standa yfir næstu fjórtán daga. Fyrstu tvo dagana er spáð hærri hita en hefur nokkurn tímann verið á mótinu.

Fyrra metið er frá árinu 2015 þegar hitavísitalan, sem mælir hita, vind og raka, reis hæst upp í 35,7 gráður. Þá féll boltastrákur í yfirlið og tenniskappinn Bernard Tomic þurfti aðhlynningu sjúkraþjálfara eftir hitaslag.

Ný regla hefur verið sett fyrir mótið í ár til að koma í veg fyrir að slíkt endurtaki sig. Þegar hitinn fer yfir þrjátíu stig geta keppendur tekið tíu mínútna vatnspásur.

Báðir keppendur hafa rétt á tíu mínútna pásunni og geta tekið hana eftir annað settið í þriggja setta leikjum eða eftir þriðja settið í fimm setta leikjum.