Sex leik­menn Ís­lands í lyfja­próf

Lyfjaprófunarteymi UEFA kom og tók sex leikmenn íslenska hópsins í lyfjapróf, vegna þátttöku liðsins á Evrópumótinu í fótbolta sem hefst núna á miðvikudaginn.

Það ber að taka skýrt fram að ekki ku nokkur grunur um ólöglega lyfjanotkun hjá stelpunum okkar. Prófin eru einfaldlega fylgifiskur þess að spila á meðal bestu þjóða Evrópu og eru öll liðin heimsótt.

Eðli málsins samkvæmt var enginn í íslenska hópnum varaður við þessari heimsókn en það mun þó hafa gengið nokkuð fljótt fyrir sig að fá leikmenn til að pissa í glösin og afgreiða málið. Heimsóknin riðlaði því dagskránni ekki mikið en æfingu og fjölmiðlahittingi dagsins var frestað um eina klukkustund af þessum sökum.

Fyrsti leikur Íslands er gegn Finnlandi á miðvikudag, klukkan 16 að íslenskum tíma. Liðið mætir svo Sviss á sunnudaginn og Noregi 10. júlí.