42 pró­sent fanga er­lendir ríkis­borgarar

Þetta kemur fram í svari dómsmálaráðherra við fyrirspurn Bergþórs Ólasonar, þingmanns Miðflokksins, sem birt var á vef Alþingis í gær.

Þar segir að á síðasta ári hafi að meðaltali 31 erlendur ríkisborgari afplánað fangelsisrefsingu á hverjum degi, en samtals hafi 218 erlendir ríkisborgarar hafið afplánun eða gæsluvarðhald í fangelsi það ár. Þá segir að hinn 15. mars síðastliðinn hafi 32 erlendir ríkisborgarar verið í afplánun í fangelsinu.

Í svarinu kemur fram að árið 2024 hafi að meðaltali 28 erlendir ríkisborgarar setið í gæsluvarðhaldi á hverjum degi. 

„Samtals hófu 208 erlendir ríkisborgarar gæsluvarðhald það ár og af þeim voru 63 í gæsluvarðhaldi á grundvelli útlendingalaga. Hinn 15. mars 2025 sátu 37 erlendir ríkisborgarar í gæsluvarðhaldi í fangelsi, þar af voru fjórir í gæsluvarðhaldi á grundvelli útlendingalaga,“ segir í svarinu.

Ennfremur segir að allt árið 2024 hafi 208 erlendir ríkisborgarar verið úrskurðaðir í gæsluvarðhald samanborið við 182 erlenda ríkisborgara árið áður. „Á sama tíma fjölgaði úrskurðum einnig vegna íslenskra ríkisborgara, en árið 2024 voru 90 íslenskir ríkisborgarar úrskurðaðir í gæsluvarðhald samanborið við 59 árið 2023,“ segir í svari dómsmálaráðherra.