Hæsta kona heims lék sinn fyrsta lands­leik

Hinn átján ára gamla Ziyu stóðst allar væntingar og skoraði átján stig í frumraun sinni.

En af hverju eru allir að missa sig yfir frumraun hennar. Jú Ziyu er 220 sentimetrar á hæð og gnæfir yfir flesta meðspilara og mótherja.

Heimsmetabók Guinness segir að hin tyrkneska Rumeysa Gelgi sé hæsta kona heims en hún er „bara“ 215 sentimetrar á hæð.

Zhang Ziyu er þegar orðin 220 sentimetrar og fær eflaust vottun frá Heimsmetabók Guinness fljótlega.

Ziyu hafði þegar vakið athygli með frammistöðu sinni með yngri landsliðunum þar sem hún var algjörlega óstöðvandi undir körfunni.

Í þessum leik við Bosníu kom hún fyrst inn á völlinn um miðjan fyrsta leikhlutann. Hún skoraði strax átta stig í röð en settist svo aftur á bekkinn.

Ziyu kom síðan aftur inn undir lokin og skoraði aftur átta stig í röð. Þegar hún fær boltann undir körfunni þá á enginn möguleika í hana.

18 stig og 7 fráköst var uppskeran þrátt fyrir að hún fengi ekkert að spila nema í þrettán mínútur í leiknum. Kína vann Bosníu líka örugglega 101-55.

„Okkur þótti mikið til hennar koma. Ég vona að ég fái að spila meira með henni,“ sagði reynsluboltinn Han Xu. Han Xu er sjálf 211 sentímetrar á hæð og því engin smásmíði heldur.

Þetta var æfingarleikur fyrir komandi Asíukeppni í Jinan þar sem þær kínversku hljóta að vera til alls líklegar.