Skjálfti fannst í Hvera­gerði

Skjálftinn mældist í Hengli og á upptök sín norðvestan Hveragerðis. Samkvæmt færslum á íbúahóp Hvergerðinga á Facebook fannst skjálftinn þar á bæ. Skjálftar eru algengir á svæðinu, að sögn sérfræðings á Veðurstofu Íslands.

„Þetta er virkt jarðhitasvæði og þetta fylgir þeim. Svo er þetta líka vestasti hluti suðurlandsbrotabeltisins. Þannig að það eru alltaf hreyfingar,“ segir Ingibjörg Andrea Bergþórsdóttir náttúruvársérfræðingur í samtali við fréttastofu.

Fyrstu stærðarmælingar liggja ekki fyrir að sögn Ingibjargar sem gerir ráð fyrir að skjálftinn sé í kringum 3 að stærð. Frekari upplýsingar liggi fyrir von bráðar.