Skorar á Unu Torfa í til­efni dagsins

„Skjótum upp fána, skært lúðrar hljóma, skundum á Þingvöll og treystum vor heit.“

Svo orti skáldið hér um árið en Íslendingar eru einmitt hvattir til að fjölmenna á Þingvöll í dag og taka þátt í sérstakri hátíðardagskrá sem ber nafnið Skundum á Þingvöll til að hita upp fyrir 17. júní.

Skorar á Unu Torfa

Um fjölbreytta dagskrá er að ræða en Einar Á. Sæmundsen, þjóðgarðsvörður á Þingvöllum, segir að þar ættu allir að finna eitthvað við sitt hæfi.

„Það verður kórsöngur hér við Lögberg fram til þrjú. Svo kemur leikhópurinn Lotta klukkan fjögur. Svo mun Una Torfa loka dagskránni í dag með tónleikum sem hefjast klukkan hálf sex og mun spila einhverja stund. Þar fyrir utan er líka hin sívinsæli fornleifaskóli barnanna.“

Mun Una taka sín lög eða mun hún jafnvel syngja Öxar við ána í tilefni dagsins? 

„Ég bara treysti því og skora á hana hér í þessu viðtali líka. Hún mun auðvitað taka öll sín frábæru lög en ég verð illa svikinn ef hún tekur ekki Öxar við ána líka.“

Guðni Th. standi sig prýðilega

Að auki heldur Guðni Th. Jóhannesson, fyrrverandi forseti, utan um söng og sögugöngu sem stendur nú yfir á Þingvöllum. Guðni starfar sem landvörður í hlutastarfi í sumar og hefur staðið sig með prýði í starfi að sögn Einars.

„Hann stendur sig ógnarvel eins og hans er von og vísa. Hann stendur svo hérna vaktina í allan dag eftir að hann hefur lokið sinni gönguferð.“

Einar bendir fólki á tímabundin bílastæði sem er búið að koma upp við grasflötinn við Öxarárfoss og hvetur fólk til að taka saman höndum í sumarblíðunni.

„Það er staðurinn þar sem menn eiga að safnast saman og treysta sín heit.“