Ræddi metið við son Tryggva: „Myndi skipta mig miklu máli að ná þessu meti“

Pedersen á aðeins fjögur mörk í marka­met Tryggva Guð­munds­sonar (131 mark í efstu deild) sem Pat­rick viður­kennir að vita ekki mikið um.

„Ekki mikið en ég spilaði með syni hans, Guð­mundi Andra, og við höfum aðeins rætt þetta. Hann var ekki ánægður með að ég ætlaði mér að spila lengur á Ís­landi,“ sagði Patrick sem skrifaði undir nýjan tveggja ára samning við Val fyrir tímabilið. 

„Það myndi skipta mig miklu máli að ná þessu meti. Þetta er stórt met að eiga. Vonandi næ ég því áður en tíma­bilinu lýkur. Ég setti það sem mitt persónu­lega mark­mið fyrir tíma­bilið að ná þessu meti, vonandi rætist það. Aðal ein­beiting mín fer hins vegar á að hjálpa liðinu að vinna eins marga leiki og mögu­legt er og vonandi keppa um Ís­lands­meistara­titilinn.“

„Allt í lagi að setja pressu á þennan mann“

Og þessi sýn rímar við það sem Haukur Páll, fyrrverandi liðsfélagi Patricks og núverandi aðstoðarþjálfari Vals segir okkur um Danann knáa, hann sé fyrst og fremst liðs­maður.

„Hann myndi alla daga velja það að skora núll mörk og vinna eitt­hvað. Hann hefur hins vegar bara það mikil gæði að hann skorar líka. Ef að hann er ekki í besta færinu þá finnur hann liðs­félaga sem mögu­lega skorar. Hann er ekki þessi eigin­gjarni fram­herji, þvílíkur liðs­maður.“

Sérðu fyrir þér að hann slái marka­metið?

„Já ég býst við því,“ svarar Haukur Páll. „Jú það er allt í lagi að setja pressu á þennan mann. Hann hefur verið með pressu áður á sér en skilar alltaf sínu. Jú eigum við ekki að segja að hann slái þetta marka­met. Ef það kemur ekki í ár þá kemur það á næsta ári. En við vonum svo inni­leg að það komi í ár.“

Fjallað var um markametið í Sportpakka Sýnar í gærkvöldi. Innslagið má sjá hér fyrir ofan. Fljótlega eftir að það fór í loftið skoraði Patrick tvennu gegn Stjörnunni, sem hækkaði markafjölda hans upp í 127 mörk.