Vilja tæpa tólf milljarða fyrir Garnacho

Það er endi miðillinn Independent sem greinir frá. Þar segir að allt að fimm félög séu áhugasöm um að fá hinn tvítuga Garnacho í sínar raðir. Hann mun þó kosta skildinginn.

Garnacho tók þátt í 58 leikjum á nýafstaðinni leiktíð. Skoraði hann 11 mörk ásamt því að gefa 10 stoðsendingar. Hann var hins vegar ekki í byrjunarliði Man United þegar liðið tapaði fyrir Tottenham Hotspur í úrslitum Evrópudeildarinnar.

Lét hann pirring sinn í ljós í viðtali eftir leik og var það kornið sem fyllti mælinn hjá Ruben Amorim. Fyrir leik var talið líklegt að Garnacho myndi yfirgefa félagið í sumar þar sem hann passar ekki beint inn í leikkerfið sem Amorim vill helst spila.

Garnacho er samningsbundinn til ársins 2028 og þar sem hann er gríðarlega eftirsóttur getur félagið sett svo háan verðmiða á leikmanninn. Meðal liða sem eru sögð á eftir landsliðsmanni Argentínu eru Ítalíumeistarar Napoli, Bayer Leverkusen, Atlético Madríd, Chelsea og Aston Villa.

Það stefnir í talsverðar breytingar á leikmannahópi Rauðu djöflanna í sumar. Nú þegar hefur verið staðfest að Victor Lindelöf, Jonny Evans og Christian Eriksen verði ekki áfram. Þá er næsta víst að félagið vill losna við þá Marcus Rashford og Jadon Sancho. Svo virðist sem Garnacho fari svo sömu leið.