Chelsea vill Gittens áður en glugginn lokar

Hinn tvítugi Gittens lék með Chelsea um stund sem krakki en unglingaliðsferill hans hófst fyrir alvöru hjá Manchester City. Þaðan fór hann til Dortmund árið 2020 og hefur verið allar götur síðan.

Hjá Chelsea er Gittens ætlað að fylla skarð Jadon Sancho sem var á láni hjá Chelsea á nýafstaðinni leiktíð. Á sama tíma er Sancho orðaður við enn eina endurkomuna til Dortmund geti hann og félagið náð saman um kaup og kjör.

Gittens hefur ekki enn leikið fyrir A-landslið Englands en á að baki 28 leiki fyrir yngri landsliðin, þar af 11 fyrir U-21 árs landsliðið.

Sky Sports greinir nú frá að Chelsea hafi boðið 42 milljónir punda – 7,2 milljarða íslenskra króna - í leikmanninn en Dortmund er sagt vilja fá í kringum 50 milljónir. Þá hefur Gittens sjálfur sagt Dortmund að hann hafi ekki áhuga á að vera áfram hjá liðinu.

Alls hefur Gittens spilað 106 leiki fyrir Dortmund, skorað 17 mörk og gefið 14 stoðsendingar.