„Þetta er úr­koma sem má vænta á ein­hverra ára­tuga fresti“

Talsverð úrkoma hefur frallið á norðanverðu landinu síðan á þriðjudag. Lítil aurspýja féll í fyrrinótt fyrir ofan Ólafsfjarðarveg og tvö lítil snjóflóð í Ósbrekkufjalli. Magni Hreinn Jónsson, ofanflóðasérfræðingur, hafði ekki frétt af skriðuföllum í nótt.

„Það kólnaði í nótt þannig að það hefur snjóað langleiðina niður í byggð sem er jákvætt með tilliti til skriðuhættu og aðeins dregið úr úrkomu en það verður svipuð úrkomu áfram í dag og fram á kvöld þannig að það er viðvarandi skriðuhætta.“

Mesta úrkoman var og er á Ólafsfirði og þykir hið mikla vatnsveður fremur óvanalegt.

„Þetta er úrkoma sem má vænta á einhverra áratuga fresti, kannski 20 til fimmtíu ára fresti þó það eigi eftir að skoða það aðeins betur en þetta er ekki algengur atburður.“ segir Magni Hreinn ofanflóðasérfræðingur.

Slökkviliðið stóð í ströngu

Slökkvilið Fjallabyggðar stóð í ströngu í gær við að koma vatni, sem hafði safnast saman í miðbæ Ólafsjarðar, út á sjó. Þá fékk slökkviliðið fimm minniháttar aðstoðarbeiðnir vegna vatnstjóns. Jóhann K Jóhannsson slökkviliðsstjóri segir að það hafi gengið vel að takast á við vatnsverðið fyrir norðan.

„Útlitið er miklu skárri en í gær. Það hefur dregið töluvert úr úrkomu og mikið af því vatni sem er að koma úr fjallinu fyrir ofan Ólafsfjörð er að skila sér niður til að mynda þá er það vatn sem var miðsvæðis á lægsta punkti í kringum sundlaugina og íþróttamiðstöðina á Ólafsfirði það er meira eða minna horfið. Þannig að kerfið er að skila vatninu bara út í sjó eins og við viljum að það geri.“

Lögreglan á Norðurlandi eystra hafðií gær mælst til þess að íbúar í nokkrum götum myndu ekki dvelja um liðna nótt í herbergjum sem hefðu glugga eða dyraop sem snúa að fjallshlíðinni vegna skriðuhættu en betur fór en á horfðist.

Slökkviliðið undirbjó sig með almannavörnum og sérfræðingum Veðurstofunnar í aðdraganda vatnsveðursins.

„Uppsöfnuð úrkoma fyrir alla þessa daga þá var spáð um 400 millimetrum sem er um það bil tvöfalt meira heldur en við tókumst á við í svona mikilli rigningu í Ólafsfirði 2021 og maður upplifði það bara sjálfur í miðbænum, þetta var gífurleg rigning sem bæði var í gær og í fyrradag.“

Fjallshlíðin hvít öðrum megin en iðagræn hinum megin

Ólafsfjörður beri þess skýr merki að nú sé óvanalegt júníveður.

„Það er merkilegt að horfa í gegnum Ólafsfjörðinn vegna þess að í fjallshlíðinni sem er vestan megin í firðinum, þar nær snjólínan alveg niður undir byggð en í fjallshlíðinni að austanverðu þar er kannski snjólínan í þrjú eða fjögur hundruð metra hæð þannig að þú ert með græna hlíð öðrum megin og hvíta hlíð hinum megin,“ segir Jóhann K. Jóhannsson slökkviliðsstjóri Fjallabyggðar.