Á­kváðu að stöðva ekki tón­leikana: „Þá fyrst hefði skrattinn hitt ömmu sína“

„Það er náttúrulega ýmislegt hægt að setja út á, en það er gott að vera vitur eftir á,“ segir Birgir Bárðarson, framkvæmdastjóri Íþrótta- og sýningarhallarinnar hf., sem hefur með höndum rekstur Laugardalshallar. Þar fóru fram stærðarinnar tónleikar undir merkjum útvarpsþáttarins FM95Blö á laugardagskvöldið, þar sem mikill troðningur myndaðist líkt og fjallað hefur verið um.

Atvikið varð um miðbik tónleikanna, eftir að FM95Blö-þríeykið Auðunn Blöndal, Egill Einarsson og Steinþór Hróar Steinþórsson höfðu spilað fyrir gesti tónleikanna. Fimmtán manns leituðu á bráðamótttöku eftir tónleikana og einn var lagður inn á sjúkrahús. Þríeykið eru aðstandendur tónleikanna en fyrirtækið Nordic Live Events sá um skipulag þeirra.  

Stjórna því ekki hvað viðburðahaldarar gera

Birgir segir að aðkoma Íþrótta- og sýningarhallarinnar hf. hafi verið að gæta að húsinu sjálfu, og greiðri aðkomu viðbragðsaðila og skipuleggjenda þar inn.

„Við stjórnum ekki hvernig viðburðahaldari vill útsetja sína þjónustu gagnvart kúnnum sínum. Að því sögðu þá erum við auðvitað, út frá þessu, að breyta verkferlum og munum gera ítarlegri kröfur um fyrirkomulag. Það verður gert eftir þessa rýningu sem við erum að vinna í,“ segir Birgir. Næstu dagar muni fara í að skoða það sem betur hafi mátt fara, meðal annars með aðstoð upptaka úr öryggismyndavélum.

Undirbúningur tónleikanna var að sögn Birgis í samræmi við allt verklag. 

„Það má segja að það hafi brostið þarna með gæsluhlutann á þessu svæði, sem er þrengingarsvæðið við tröppurnar. Það er þar sem þetta myndast. Þetta er eitthvað sem við erum að rýna í. Við erum svolítið að skoða alla þessa þætti, hverjir komu að, hvað veldur þessu og hvað er í gangi. Við vitum að spenningurinn hjá fólki var að fylgjast með atriðinu hjá þeim félögum. Þetta eru margir þættir sem koma saman á sama augnablikinu. Svo gerist þetta leiðindaatvik í andyrinu, þessir tveir hópar sem eru að fara hvor í sína áttina og hvorugur gefur eftir.“

Birgir segir lögreglu hafa náð stjórn á aðstæðunum með hárréttum viðbrögðum. Strax í kjölfarið hafi verið ráðist í greiningu á atvikinu.

„Við gerðum það hratt og vel, og fórum svo bara í það að halda áfram með viðburðinn. Það var í lagi með 7.000 manns inni í salnum, það var gott loft og góður andi í fólki. Þannig að það var miklu betra fyrir alla að halda áfram heldur en að loka á tónleikana. Þá fyrst hefði skrattinn hitt ömmu sína, eins og sagt er,“ segir Birgir. Samkvæmt hans upplýsingum hafi 8.600 manns sótt viðburðinn.

Gagnrýnin í senn réttmæt en uppblásin

Birgir segist sannfærður um að gott samstarf við lögreglu, slökkvilið og yfirmenn gæslunnar á staðnum hafi ráðið því að stjórn hafi náðst á aðstæðunum.

„Við náðum að rétta úr þessu og auðvitað er þetta eitthvað sem við þurfum að læra af. Ég óska engum að þurfa einhvern tímann að lenda í svona. Við þurfum bara að gera betri verkferla og sterkari verkferla.“

Ísleifur Þórhallsson, formaður Bandalags íslenskra tónleikahaldara og framkvæmdastjóri Senu live, var harðorður í garð tónleikahaldara í viðtali á Bylgjunni í morgun, og sagði þá heppna að enginn hefði látið lífið. Hann sagði jafnframt að skoða þyrfti regluverkið í kringum tónleikahald. 

Birgir segir að einhverju leyti hægt að taka undir gagnrýni sem Ísleifur setti fram í viðtalinu.

„Margt sem Ísi er að segja er alveg rétt og allir eiga að taka tillit til þess, en við verðum líka að gæta þess að vera ekki að blása upp einhverja kúlu sem er ekki alveg rétt, þegar menn voru ekki á staðnum sjálfir. Við höfum átt frábært samstarf, ég og Ísleifur, og ég á ekki von á öðru en að við höldum því áfram með góðum úrlausnum. Hans þáttur í að koma að tónleikahaldi er bara mjög sterkur og mikilvægur fyrir okkur til þess að koma þessu í lag. Ég held að þetta skýri sig núna á næstunni, og að menn verði að koma sér aðeins niður á jörðina líka.“

Hryllingssögur ekki fengist staðfestar

Á samfélagsmiðlum hafa birst sögur af algjöru upplausnarástandi á tónleikunum. Þar á meðal eru sögur af því að svo langar raðir hafi verið á salerni hallarinnar, sem voru 134 samkvæmt Birgi, að einhverjir tónleikagesta hafi gert þarfir sínar á gólfið. Birgir segist hafa heyrt af sögusögnum þess efnis.

„Við vorum með 22 einstaklinga bæði í rusli og þjónustu í kringum salina og annað. Ég er búinn að spyrja þau hvort þau hafi verið að þrífa eftir eitthvað slíkt. Það er ekkert svoleiðis, þau höfðu ekki lent í neinu eða séð neitt. Hvort þetta er sögusögn eða einstakt atvik sem er blásið upp, af því þetta er ógeðslegt, veit ég ekki,“ segir Birgir. Þannig hafi ekkert verið staðfest um þetta að svo stöddu.

„Þetta er hluti af því sem við rýnum líka. Að tryggja það að aðstaða og salerni á þetta löngum tónleikum séu það vel búin að þetta sé í lagi. En það er ekkert hús á landinu með jafn mörg klósett fyrir viðburðahald, sem eru staðbundin í húsinu. Þau eru gerð til að taka svona massakeyrslu, þannig að það væri leitun að því að finna hús sem getur tekið aðra eins keyrslu.“ 

Þá hafi tíu salernum verið komið fyrir á útisvæði.

„En við vitum það líka að á svona löngum tónleikum þar sem er mikil drykkja, hvort sem við erum að tala um áfengi eða ekki, þá þarf fólk auðvitað að skila þessu. Þá þarf kannski aðeins að hugsa þetta upp á nýtt, og það er líka það sem við erum að taka til skoðunar,“ segir Birgir. 

Ítarlegri kröfur verði gerðar til tónleikahaldara

Mögulegt er, að sögn Birgis, að auknar kröfur verði gerðar á tónleikahaldara. 

„Frekari lýsingu á því sem þarf að gæta að. Ég vona bara að þetta verði til bóta á öllu tónleikahaldi á Íslandi og hjálpi öðrum húsum líka.“

Þrátt fyrir að mögulega verði gerðar auknar kröfur er Birgir ekki þar með að segja að menn hafi stytt sér leið í sparnaðarskyni.

„Nei, nei. Það segir sig sjálft að þarna verður einhver þrýstingur á milli svæða sem enginn sá fyrir. En það má síðan alltaf deila um það hver fjöldi gæslumanna átti að vera á þessum stað, sem hefðu getað stýrt umferð betur. Eins og ég segi, rýning er það eina sem hjálpar okkur núna áður en við getum svarað eitthvað frekar. En nei, menn voru ekki að stytta sér leið.“

Þríeykið að baki FM95Blö, þeir Auðunn Blöndal, Egill Einarsson og Steinþór Hróar Steinþórsson hafa ekki svarað ítrekuðum beiðnum fréttastofu um viðtal vegna málsins í dag. Þá hefur Björgvin Þór Rúnarsson hjá Nordic Live Events heldur ekki orðið við beiðni um viðtal.