Handbolti

Ís­lendingalið Melsun­gen heldur í við topp­liðin

Runólfur Trausti Þórhallsson skrifar
Elvar Örn Jónsson í leik með Melsungen.
Elvar Örn Jónsson í leik með Melsungen. Getty/Swen Pförtner

Spennan um þýska meistaratitil karla í handbolta er hreint út sagt óbærileg þegar aðeins tvær umferðir eru eftir. Aðeins eitt stig skilur topplið Füchse Berlín að Magdeburg. Þar á eftir kemur Melsungen, aðeins tveimur stigum á eftir toppliðinu.

Magdeburg vann fyrr í dag mikilvægan sigur en segja má með sanni að stigin tvö hafi reynst dýrkeypt. Íslenski landsliðsmaðurinn Gísli Þorgeir Kristjánsson var meiddur af velli í upphafi leiks vegna meiðsla á öxl.

Með sigrinum fór Magdeburg tímabundið á toppinn en refirnir frá Berlín hirtu toppsætið á ný með stórsigri á Stuttgart. Lokatölur í þeim leik 35-20 Füchse Berlín í vil. Hinn danski Mathias Gidsel kom að flestum mörkum, skoraði fimm og gaf fjórar stoðsendingar.

Melsungen vann nauman eins marks sigur á Eisenach, lokatölur 26-25. Elvar Örn Jónsson skoraði tvö mörk og gaf þrjár stoðsendingar. Arnar Freyr Arnarsson skoraði eitt mark.

Füchse Berlín er með 54 stig, Magdeburg með 53 stig og Melsungen 52 stig.

Handbolti Þýski handboltinn

Mest lesið


Fleiri fréttir

Sjá meira


×

Mest lesið