Sam­eining við Kviku banka mun taka langan tíma

Íslandsbanki telur að viðræður um sameiningu eigi að byggja á markaðsvirði beggja félaga og segir í tilkynningu bankans til Kauphallar að Íslandsbanki sé reiðubúinn að bjóða tíu prósent ofan á markaðsvirði Kviku við útreikning á skiptihlutföllum. Stjórn Arion banka óskaði eftir því í gær við stjórn Kviku að hafnar yrðu samrunaviðræður milli Arion og Kviku. Í lok febrúar afþakkað stjórn Íslands­banka boð um samrunaviðræður við Ari­on banka.

„Líkurnar á sameiningu Kviku við viðskiptabanka eru meiri en ef tveir viðskiptabankar eru sameinaðir. Það er samt líklegt að það verða einhver skilyrði frá Samkeppniseftirlitinu varðandi sameininguna,“ segir Snorri og bætir því við að báðir viðskiptabankarnir, Arion og Íslandsbanki eru umtalsvert stærri en Kvika banki. Heildareignir Kviku banka eru 342,8 milljarðar króna en heildareignir Íslandsbanka 1.667 milljarðar og Arion 1.668 milljarðar króna. Enn stærri munur sé ef horft er til útlána. Hjá Kviku nema útlán 160,6 milljörðum króna, hjá Íslandsbanka nema útlán til viðskipta 1.299 milljörðum og hjá Arion nema útlán 1.234 milljörðum króna.

Hvor bankinn er þá líklegri til að sameinast Kviku?

„Það verður að koma í ljós enda er það stjórnenda og stjórnar að meta það. Hinsvegar er það þannig að ef þeir eiga að sinna hagsmunum hluthafa þá er hærra verðið örugglega það sem þeir munu horfa til. Hvort sem viðræður hefjast við Arion eða Íslandsbanka þá er ljóst að þetta mun taka töluvert langan tíma. Þetta er langt ferli sem er ekki að fara að gerast á næstu mánuðum heldur frekar nær heilu ári. Það er samt töluvert líklegra að Samkeppniseftirlitið blessi þetta frekar en sameiningu tveggja viðskiptabanka. Það er samt einhver skörun þar sem Kvika hefur verið að koma sér meira fyrir á einstaklingsmarkaði núna en var fyrir nokkrum mánuðum og er þá í samkeppni við viðskiptabankana. Samkeppniseftirlitið mun horfa til þess,“ segir Snorri.

Kvika býður óverðtryggð húsnæðislán

Auður, fjármálaþjónusta Kviku banka, hóf í morgun innreið sína á húsnæðislánamarkað. Fram kom í tilkynningu að Auður bjóði upp á húsnæðislán á „bestu kjörum sem bjóðast á breytilegum óverðtryggðum vöxtum“.

Um er að ræða óverðtryggð húsnæðislán fyrir þau sem eiga meira en 45% í sinni eign. Vextir verða breytilegir, 8,5% til að byrja með, og eru það lægstu vextir sambærilegra lána á markaðnum í dag, segir í tilkynningu bankans.

Við þessi tíðindi hækkuðu bréf í Kviku um 8,8% fyrir hádegi í dag.

„Það kemur ekki sérstaklega á óvart að Kvika sé að bjóða lægri vexti fyrir þá sem eiga meira eigið fé,“ segir Snorri. „Það er til samræmis við reglugerðabreytingar þar sem eiginfjár binding er minni fyrir áhættulítil íbúðalán. Þá myndast ákveðið svigrúm til þess að bjóða upp á hagstæðari kjör fyrir þá sem eiga mikið eigið fé. Varðandi fasteignamarkaðinn þá er ekki að sjá að þetta hafi sérstaklega mikil áhrif á hann heldur frekar á neyslu. Einhverjir munu færa sig yfir í þessi hagstæðari kjör og eiga þá meira á milli handana.“

Þannig að þetta eru ekki lán fyrir fyrstu kaupendur?

„Nei, þetta er ekki fyrir þann hóp og mun ekki ýta upp verði fyrir minni íbúðum. Fyrir stærri íbúðir, þegar kaupendur þurfa væntanlega að skuldsetja sig mikið, þá horfa þeir væntanlega til ódýrasta lánsins sem er verðtryggt eða mögulega fasta óverðtryggða vexti sem eru á örlítið betri kjörum.“