Viltu kynnast töfrum Taí­lands?

Heimsferðir munu bjóða upp virkilega spennandi ferð til Taílands dagana 24. nóvember til 7. desember þar sem óhætt er að lofa miklu ævintýri. „Það er ekki auðvelt að lýsa því hvað er svona heillandi við Taíland því það er svo ótal margt,“ segir Davíð Sigurþórsson fararstjóri ferðarinnar.

„Þar spila inn þættir eins og glaðvært fólk, litrík menning, hvað það er þægilegt að eiga í samskiptum við innfædda, ótrúlega falleg náttúra og svo auðvitað maturinn sem er í algjörum sérflokki.“

Algjör veisla fyrir bragðlaukana.

Hann segir að á ferðalögum sínum um heiminn hafi hann aldrei kynnst eins miklum fjölbreytileika þegar kemur að matargerð eins og í Taílandi. „Að heimsækja taílenskan veitingastað er einstök upplifun og sannkölluð veisla fyrir bragðlaukana. Taílendingar eru ekki einn þjóðernishópur heldur margir og það endurspeglast svo sannarlega í matargerðinni.“

Davíð hefur starfað við fararstjórn undanfarin 20 ár sem köfunarleiðsögumaður hér á landi, þrammað á fjöll og gengið fáfarnar leiðir um Ísland með forvitnum ferðalöngum og leitt Íslendinga um undur og ævintýri Asíu.

Davíð er menntaður í siðfræði og ferðamálum á Íslandi, í Svíþjóð og Víetnam og hefur leitt metnaðarfulla leiðangra um Balí, Víetnam, Kambódíu og Taíland auk þess að ferðast víðar um Asíu og gjörvallan hnöttinn.

Galdur og fjölbreytileiki í bland

Taíland er yndislegt land og býr yfir svo mögnuðum galdri og fjölbreyttum og ólíkum hliðum segir Davíð en hann bjó þar í landi í fjögur ár. „Í þessari ferð ætlum við að kanna menninguna í gegnum mat og drykk þjóðarinnar, skoða fáfarin jafnt sem stórfræg hof og hallir til að skilja söguna og nálgast menninguna enn betur með því að eiga náðugar stundir í sveitum og þorpum til að taka púlsinn á margskiptu samfélaginu.“

Og meira um matinn, er annað hægt? Íslendingar hafa kynnst taílenskri matargerð hér á landi og á ferðalögum undanfarin ár og ættu að þekkja vinsælustu réttina. „Það má segja að hvert landsvæði hafi sinn matarstíl og einkennisrétti,“ segir Davíð. „Í norðri má nefna khao soj súpuna, í suðri rækju carpaccio og gerjað karrí með svínakjöti. Í austur hluta landsins er Som Tam salatið í öll mál og í kringum höfuðborgina Bangkok má finna mildari og fínlegri rétti, til dæmis stropuð og kæst egg, svöluhreiðurssúpu, reykta kókoskássu í bambus, maura eggjahræru, fiðrildalirfur steiktar með kafírlaufi svo dæmi séu tekin af sérkennilegum en um leið dásamlegum mat.“

Hópurinn frá Heimsferðum fær að bragða á mörgum þessara rétta með heimsóknum á fína veitingastaði með dúkklæddum borðum, á fjörugum wok stöðum í kínahverfinu eða í einhverri skrítinni búllu í öngstræti.

Ferðalangar kynnast ólíkum hlutum Taílands

Í ferðinni verður farið yfir ansi stórt landsvæði, til að mynda vestur að landamærum Myanmar við Kanchanaburi, upp í norðrið til Chiang Mai, um Ayutthaya, sem er gamli höfuðstaður Siam og hina frábærlega klikkuðu höfuðborg landsins, Bangkok, sem verður skoðuð ofan í kjölinn.

„Þessi flotta ferð er sett saman með það í huga að kynna fólki ólíka hluta þessa víðfeðma og margslungna lands. Markmið okkar er að færa ferðalanga nærri þjóðinni með því að velja smærri og öðruvísi gististaði og borða á lítt þekktum og stundum hálf földum einstökum veitingastöðum. Það er von okkar hjá Heimsferðum að ferðin gefi tækifæri til að sjá ögn undir yfirborðið og ferðast jafnt lárétt sem lóðrétt um bæði land og menningu og skilja fólkið og landið.“

Sérstakur kynningarfundur verður haldinn fimmtudaginn 22. maí í Lions salnum Hlíðasmára 14 í Kópavogi og hefst hann kl. 16.30 og 17.30 (val um tvo tíma). Þar verður ferðin kynnt betur ásamt fleiri áfangastöðum eins og Víetnam, Balí og Mexíkó. Boðið verður upp á léttar veitingar.