Dæmdur fyrir að keyra yfir eigin­konu sína eftir rifrildi um eld­hús­inn­réttingu

Þau Hoskins og Dennis eru bæði fyrrverandi Ólympíufarar í hjólreiðum. Hoskins lést fyrir utan heimili þeira í Adelaide í Ástralíu, síðla árs 2023, eftir rifrildi hjónanna. Fram kom við réttarhöldin yfir Dennis að rifrildi hjónanna, sem áttu tvö börn saman, hefði verið um eldhúsinnréttingu.

Dennis var ákærður fyrir „gróft athæfi sem líklegt væri til að valda skaða“ og játaði sök í málinu. Brot hans varðaði að hámarki sjö ára fangelsi. Hann hafði fyrst verið ákærður fyrir manndráp af gáleysi.

Við réttarhöldin kom fram að Hoskins hefði hoppað upp á vélarhlíf bílsins þegar Dennis ætlaði að aka í burtu eftir rifrildi þeirra. Hún hefði svo fært sig og gripið í hurð bílsins á meðan að Dennis ýtti á bensíngjöfina. Það endaði svo með því að hún hrasaði og dróst undir bílinn. Hún var flutt á sjúkrahús en lést af sárum sínum.

Það var mat dómara að Dennis hefði engu skeytt um öryggi eiginkonu sinnar en að hann væri ekki ábyrgur fyrir dauða hennar með glæpsamlegum hætti.

Dómarinn Ian Press kvaðst sýna því skilning að Dennis hefði reynt að stöðva rifrildið með því að aka í burtu en að það væri ekki afsökun fyrir hegðun hans. „Það var þín skylda að stöðva ökutækið þegar það var farið að ógna heilsu hennar,“ sagði dómarinn og bætti við: „Það að þú hafir ekki stoppað vegna þess að þig langaði til að komast í burtu er mjög léleg ástæða fyrir því að gera það ekki.“

Foreldrar Hoskins vilja gott samband vegna barnanna

Peter og Amanda, foreldrar Hoskins, ræddu við fjölmiðla eftir dóminn og sögðust „ánægð“ með að dómur væri loks fallinn og að þau vonuðust til að fjölskyldan gæti nú „haldið áfram“ sínu lífi:

„Hún var algjörlega einstök,“ sagði Peter pabbi Hoskins. Hann sagði þau enn ekki hafa fengið neina afsökunarbeiðni frá Dennis en að hann vænti þess að hún kæmi með tímanum.

„Nú er tímabært fyrir okkur að snúa okkur að öðru, sem er það sem að Melissa myndi vilja að við gerðum,“ sagði Peter og bætti við að mikilvægt væri fyrir fjölskylduna að sambandið við Dennis yrði í lagi í framtíðinni, sérstaklega vegna barnanna.

„Það eru tvö ung börn flækt í þennan harmleik. Við viljum auðvitað halda áfram að vera í stóru hlutverki í lífi þeirra og framtíð,“ sagði Peter Hoskins.