Lífið

The Wire og Sopranos-leikari látinn

Atli Ísleifsson skrifar
Charley Scalies fór með hlutverk Horseface í The Wire-þáttunum.
Charley Scalies fór með hlutverk Horseface í The Wire-þáttunum. HBO

Bandaríski leikarinn Charley Scalies sem þekktur er fyrir hlutverk sín í þáttaröðunum The Wire og The Sopranos, er látinn, 84 ára að aldri. Hann lést fyrsta dag maímánaðar, en hann hafði glímt við Alzheimer-sjúkdóminn um nokkurt skeið.

Greint er frá andlátinu á sérstakri minningarsíðu.

Í frétt Variety um andlátið segir að Scalies hafi birst í öllum tólf þáttum annarrar þáttaraðar af The Wire. Hann fór þar með hlutverk hafnarverkamannsins Horseface, samverkamanns spillta verkalýðsforingjans Frank Sobotka.

Í Sopranos fór hann með hlutverk Molinaro, fótboltaþjálfara Tony á gagnfræðiskólaárum hans, sem birtist í draumum hans í fimmtu þáttaröðinni.

Scalies fór einnig með hlutverk í þáttunum Homicide: Life on the Street, Law & Order, Law & Order: SVU og Cold Case.

Þá birtist hann einnig í kvikmyndum á borð við 12 Monkeys, Liberty Heights, Jersey Girl og Two Bits.

Hann lætur eftir sig eiginkonuna Angeline M. Scalies og fimm börn.

Andlát Bíó og sjónvarp Bandaríkin


Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.