„Við gátum ekki farið mikið neðar“

„Ég er hrikalega ánægður með úrslitin. Þetta var bara flott frammistaða og erfiður leikur. Þetta Vals lið er mjög sterkt og voru ekki búnar að fá á sig mark held ég fyrir þennan leik. Þannig að við vissum að við þurftum að verjast vel, vera vel skipulagðar í vörninni og ekki gefa færi á okkur. Við vorum grimmar síðan í skyndisóknum að reyna að koma inn marki og ég hefði viljað setja fleiri en eitt. Við vorum, að mér fannst, að gera hlutina býsna vel“ sagði Jóhannes.

Stjarnan fékk á sig 12 mörk í fyrstu tveimur leikjum tímabilsins en náði að halda hreinu í dag. 

„Við gátum ekki farið mikið neðar, það er deginum ljósara. Við vitum nokkurnveginn hvernig fótbolta Valur vill spila og í hvað þær eru að leita að. Þannig við lögðum upp með að leyfa þeim að hafa boltann í öftustu línu og loka þeim svæðum sem eru hættuleg. Það gekk bara feykilega vel. Mjög agaður leikur af okkar hálfu.“

Stjarnan hefur núna unnið tvo leiki í röð eftir að hafa tapað fyrstu tveimur. Sjálfstraustið hlýtur því að aukast hjá liðinu.

„Við vitum alveg að við getum spilað góðan fótbolta. Það hefur bara vantað svolítið upp á í fyrstu leikjunum að klára öll ‘móment’. Það var bara eins og það slokknaði á okkur. Ég er bara hrikalega ánægður með það að fá tvo 90 mínútna leiki sem eru bara heilsteyptir og þokkalega þéttir.“