50+: Tómleikatilfinningin þegar börnin fljúga úr hreiðrinu

Á ensku er talað um þetta fyrirbæri sem Empty nest syndrome. Eða einkenni tóma hreiðursins.

Sumir lýsa þessari tilfinningu sem hálfgerðri tómleikatilfinningu. Á meðan aðrir upplifa þessa líðan sem ákveðna tegund af sorg. Ekki beint sams konar sorg og þegar við missum ástvin, en sorg samt.

Aðalmálið er að ef okkur er að líða á þennan háttinn, er gott að átta sig á því að það getur verið alveg eðlilegt að fara í gegnum svona tilfinningar eða skeið og í raun er þetta tímabil sem mörgum kvíður fyrir eða upplifa sjálf.

Það á við bæði um konur og karla, þó eru konur sagðar líklegri enda oftar í aðalumönnunarhlutverkinu sem foreldri. Þriðja vaktin og allt það.

Rannsóknir sýna samt að það eru nokkur atriði sem einkenna foreldra sem eru líklegri til að upplifa þetta tímabil en aðrir. Þessi einkenni eru þá helst:

• Foreldrið er einstaklingur sem á almennt erfitt með breytingar
• Foreldrið hefur áhyggjur af þessum flutningum barnsins að heiman
• Hjónabandið stendur ekki á föstum grunni eða veitir foreldrinu ekki lífsfullnægju
• Aðskilnaðarkvíði hefur verið í sambandi foreldri og barns áður, til dæmis þegar skólagangan hófst
• Foreldrið hefur skilgreint sjálfsímynd sína að miklu leyti út frá foreldrahlutverkinu
• Foreldrið var heima vinnandi og missir vissan tilgang/hlutverk við flutning barns að heiman

Ýmsar nýjar áskoranir fylgja þessu tímabili. Til að mynda þurfa foreldrar að mynda nýtt samband við barnið sitt og nú sem fullorðinn einstakling sem er fluttur að heiman. En fyrir mörg hjón er það líka stór áskorun að takast á við að verða aftur par.

Þá raskast líka ákveðin rútína á heimilinu, sem áður tengdist því að fleiri í fjölskyldunni bjuggu þar.

Stundum gerast líka margir hlutir á sama tíma. Börnin gætu til dæmis verið að flytja að heiman hjá sumum á svipuðum tíma og fólk er að hætta að vinna. Sem er áskorun út af fyrir sig.

Eða fólk, þá sérstaklega konur, eru að ganga í gegnum erfitt breytingaskeið.

Aðalmálið er að átta okkur á því að alls konar tilfinningar geta komið upp þegar börnin fljúga úr hreiðrinu. Og fyrir suma er það einfaldlega erfiðari tímabil en fyrir aðra. Flestir jafna sig á nokkrum vikum eða mánuðum, en miklu skiptir að geta rætt hlutina við einhvern; Makann, góðan vin eða fagaðila.