Hópur Snorra fyrir síðustu leikina: Reynir að verða einn af strákunum okkar

Sindri Sverrisson skrifar 25. apríl 2025 12:25

Reynir Þór Stefánsson hefur verið frábær með bikarmeisturum Fram á leiktíðinni og fær nú stórt tækifæri sem einn af strákunum okkar. vísir/Anton

Snorri Steinn Guðjónsson hefur valið nítján manna landsliðshóp fyrir tvo síðustu leiki Íslands í undankeppni EM karla í handbolta. Einn nýliði úr Olís-deildinni er í hópnum.

Hinn nítján ára gamli Reynir Þór Stefánsson úr Fram er í hópnum og gæti spilað sína fyrstu landsleiki þegar Ísland mætir Bosníu ytra 7. maí og Georgíu í Laugardalshöll 11. maí.

Ísland hefur þegar tryggt sér sæti á EM 2026 og spilar þar í riðli í Kristianstad í Svíþjóð. Ísland er með átta stig í sínum undanriðli, eða fullt hús stiga, en Georgía er með fjögur stig og Bosnía og Grikkland tvö stig hvort.

Snorri Steinn hefur endurheimt fjölda leikmanna sem misstu af síðustu landsleikjum, við Grikkland í mars. Aron Pálmarsson er þó ekki með vegna meiðsla.

Viktor Gísli Hallgrímsson, Arnar Freyr Arnarsson, Elvar Örn Jónsson, Gísli Þorgeir Kristjánsson, Ómar Ingi Magnússon og Viggó Kristjánsson snúa allir aftur inn í hópinn.

Ísak Steinsson, sem lék sína fyrstu landsleiki gegn Grikkjum, er áfram í hópnum og núna einn þriggja markvarða.

Arnór Snær og Benedikt Gunnar Óskarssynir, Elliði Snær Viðarsson og Sigvaldi Björn Guðjónsson eru hins vegar ekki með núna eftir að hafa verið með gegn Grikklandi. Á meðal annarra sem einnig eru ekki með núna má nefna Bjarka Má Elísson, Teit Örn Einarsson og Svein Jóhannsson.