Patrik og Gústi í sundur: „Vinir, veit það ekki“

Patrik Atlason, betur þekktur sem Prettyboitjokkó, braust fram á sjónarsviðið á vormánuðum ársins 2023 með laginu „Prettyboitjokkó“. Næstu mánuði eftir það var hann fyrirferðamikill í fjölmiðlum og gaf út plötuna PBT auk fjölda smáskífa sem rötuðu ofarlega á topplista, þar á meðal hið geysivinsæla „Skína“.

Sjá einnig: „Þetta verður næsta popp­stjarna Ís­lands“

Sumarið 2023 réði Patrik samfélagsmiðlastjörnuna Ágúst Beintein Árnason, betur þekktan sem Gústa B, til að vinna fyrir sig sem plötusnúð á viðburðum. Fljótlega varð Gústi að hægri hönd Patriks, vann sem umboðsmaður hans og sá um að bóka tónleika fyrir popparann.

Fyrir það hafði Birgitta Líf verið umboðsmaður Patriks og tilkynntu þau það með myndbandi af undirritun „umboðssamningsins“ þar sem pabbi Birgittu, Bjössi í World Class, og afi Patriks, Helgi í Góu, voru viðstaddir.

Gústi og Patrik fóru fögrum orðum hvor um annan í viðtali við Vísi í september 2023 og sögðu samvinnuna hafa gengið vel.

„Held við séum báðir nokkuð slakir þrátt fyrir nokkra hnökra sem viðkoma ferðalögum,“ sagði Gústi í viðtalinu en þeir voru þá nýbúnir að skemmta sér á Ibiza til að fagna góðu gengi „Skína“ og höfðu þar áður spilað í pókerferð í Slóvakíu.

Á tímabili virtust félagarnir vera eins og límdir saman, Gústi var auðvitað með Patrik á öllum tónleikum en þar að auki var Patrik tíður gestur í útvarpsþættinum Veislunni hjá Gústa og félögum á FM957. Verandi nánir samstarfsmenn birtu þeir reglulega af sér myndir saman á samfélagsmiðlum.

Áhrifamikill og umdeildur nauðgunarbrandari

Ákveðin hvörf urðu í Veislunni fimmtudaginn 1. ágúst 2024 fyrir Þjóðhátíð. Patrik var þar gestur og spurði mann, sem hringdi inn í þáttinn og var á leið á Þjóðhátíð, hvort hann ætlaði að mæta með botnlaust tjald til Eyja.

Sjá einnig: Nauðgunarbrandari Patriks féll í grýttan jarðveg

Ummælin fóru fyrir brjóstið á mörgum en með botnlausu tjaldi er átt við tjald sem hægt er að varpa auðveldlega yfir áfengisdauða manneskju til þess að brjóta á henni kynferðislega. Ekki náðist í Patrik beint eftir þáttinn en hann tróð svo upp á Þjóðhátíð með Gústa B og skemmti sér greinilega vel miðað við mynd sem birtist af þeim félögum á Instagram.

Viku síðar var Veislan tekin af dagskrá á FM957 en Þórdís Valsdóttir, forstöðumaður útvarpsmiðla Sýnar, sagðist þá ekki vilja tjá sig nánar um ástæður þess að þátturinn væri ekki lengur í loftinu. Degi síðar sendi Patrik frá sér afsökunarbeiðni.

„Ég vil biðja alla afsökunar á ruglinu í mér með botnlausa tjaldið á FM957 og ekki síst þolendur nauðgana sem eiga ekki skilið að talað sé með þessum hætti um svo alvarlegan hlut,“ sagði Patrik og bað Gústa B svo sérstaklega afsökunar.

„Einnig vil ég biðja Gústa vin minn afsökunar á því að hann hafi lent í vandræðum yfir þessum lélega brandara mínum sem ég á einn sök á,“ segir Patrik.

„Síðast þegar ég vissi varstu nú reyndar enn þá umboðsmaðurinn minn...“

Tæpri viku eftir að Veislan var tekin af dagskrá, þann 13. ágúst, birti Gústi mynd af sér á Instagram  og skrifaði við hana: „Vantar nýja vinnu - who’s hiring?“

Nokkrum dögum fyrir það hafði Gústi greint frá því í viðtali á Vísi að hann hefði einungis verið verktaki hjá FM957 og verkefnum hans hjá stöðinni því lokið. Hann liti þó björtum augum til framtíðar.

Fjöldi fólks skrifaði ummæli við færsluna og hvatti útvarpsmanninn til dáða. Hans góði samstarfsmaður og vinur Patrik Atlason minnti hann sömuleiðis á að hann væri ekki alfarið atvinnulaus: „Síðast þegar ég vissi varstu nú reyndar enn þá umboðsmaðurinn minn...“

Skömmu fyrr höfðu félagarnir hætt að birta myndir hver af öðrum á samfélagsmiðlum. Síðasta myndin sem Gústi birti af þeim félögum á Instagram var af þeim saman á Þjóðhátíð 5. ágúst. Síðasta myndin sem Patrik birti af Gústa á gramminu var enn fyrr, eða 21. júlí, á ársafmæli „Skína“.

Gústi endurreisti Veisluna í hlaðvarpsformi í október 2024 og stýrir þættinum með Guðrúnu Svövu Egilsdóttur, sem er betur þekkt sem Gugga í gúmmíbát, og Sigurði Gísla Bond Snorrasyni. Auk þess að hafa hætt að birta myndir hver af öðrum þá virðist Patrik aldrei hafa komið í nýju Veisluna, allavega ekki ef marka má Spotify, þrátt fyrir að vera mikill vinur bæði Gústa og Sigurðar Bond.

Patrik tilkynnti síðan 13. desember 2024 í Brennslunni að hann væri kominn með nýjan umboðsmann, útvarpskonuna Ósk Gunnarsdóttur. Út á við virtist samstarfinu þar með vera endanlega slitið.

Ekki lengur í samstarfi en allt á góðum nótum

Við þessa skyndilegu sviptingu, að fara úr því að vera saman daglega og birta reglulega af sér myndir yfir í að sjást ekkert saman, vöknuðu ýmsar spurningar. Í kjölfarið fór orðrómur á kreik þess efnis að samstarfið hefði endað í illu.

„Við erum ekki lengur í samstarfi, það er ekkert meira um það að segja,“ sagði Patrik um vinnusamstarfið þegar fréttastofa hafði samband.

En enn þá vinir?

„Vinir, veit það ekki. Allt á góðum nótum bara,“ sagði hann.

Fréttastofa heyrði einnig í Gústa sem hafði lítinn áhuga á að tjá sig um málið. Samstarfinu hefði lokið fyrir um átta mánuðum síðan en það hefði hins vegar alltaf staðið til frá byrjun. Hann hafi einungis verið að hjálpa vini sem var að hefja feril sinn.