Aston Villa komst yfir í París en PSG svaraði með þremur mörkum

Paris Saint Germain fer til Englands með tvö mörk í forskot eftir 3-1 sigur á Aston Villa á Parc des Princes í kvöld í fyrri leik liðanna í átta liða úrslitum Meistaradeildarinnar.

Aston Villa gerði vel í að komast yfir í leiknum en enska liðið var bara yfir í fimm mínútur. Parísarliðið svaraði marki Villa með tveimur frábærum mörkum.

Undir lokin skoraði Parísarliðið síðan þriðja markið og gerbreytti með því stöðunni fyrir seinni leikinn.

Aston Villa tekur á móti PSG á Villa Park í næstu viku og um tíma virtist að þeir væri að sleppa í burtu með eins marks tap en það breyttist síðan í uppbótatímanum.

Parísarliðið var mun betra en náði ekki að skapa mikið á móti skipulögðu og baráttuglöðu liði gestanna.

Aston Villa menn gerðu líka mjög vel í að komast yfir í leiknum.

Morgan Rogers kom Villa í 1-0 á 35. mínútu eftir hraða sókn og stoðsendingu frá Youri Tielemans. Frábært liðsmark en sóknin hófst með að fyrirliðinn John McGinn vann boltann.

Fimm mínútum var PSG búið að jafna. Désiré Doué átti þá frábært langskot sem söng óverjandi i markinu, sláin inn. Stórglæsilegt mark.

Staðan var 1-1 í hálfleik en Khvicha Kvaratskhelia kom Parísarliðinu yfir á 49. mínútu eftir einstaklingsframtak. Fékk boltann út á kanti, keyrði inn í teig, lék á varnarmann og afgreiddi síðan boltann frábærlega í markið.

Þannig var staðan þar til í uppbótatíma þegar Nuno Mendes skoraði eftir að Ousmane Dembélé hafði spilað hann í gegn. Mendes lék á markvörðinn og skoraði laglega.