Mourinho reif í nefið á stjóra mót­herjanna eftir leik

Lærisveinar Mourinho töpuðu þá 2-1 á heimavelli á móti Galatasaray í átta liða úrslitum tyrkneska bikarsins.

Eftir leikinn sást Mourinho rífa í nefið á Okan Buruk, stjóra Galatasaray liðsins. Buruk féll sárþjáður í grasið eins og sjá má hér fyrir neðan.

Það gekk mikið á í leiknum og dómarinn hafði sent þrjá leikmenn snemma í sturtu, einn hjá Fenerbahce og tvo hjá Galatasaray.

Svo mikið gekk á að lögreglan þurfti að koma inn á völlinn til að stilla til friðar.

Mourinho fékk fjögurra leikja bann eftir ummæli sín eftir síðasta leik á móti Galatasaray. Forráðamenn Galatasaray sökuðu Mourinho um rasisma sem hann neitaði harðlega.

Galatasaray sendi Mourinho skilaboð á samfélagsmiðlum eftir leikinn þar sem stóð: Þú átt ekki að ráðast á okkur heldur kyngja úrslitunum.

Í annarri færslu mátti sjá skopmynd af Jose Mourinho og undir henni stóð: Galatasaray gerir þig brjálaðan.