„Eins og draumur að rætast“

Jóhannes gengur í raðir Holstebro í Danmörku frá FH í sumar. Jóhannes kom til FH frá Víkingi fyrir þremur árum. Hann varð Íslands- og deildarmeistari með FH-ingum á síðasta tímabili.

Hjá Holstebro hittir Jóhannes fyrir Arnór Atlason en hann hefur þjálfað liðið frá því í fyrra. Holstebro er í 7. sæti dönsku úrvalsdeildarinnar.

Jóhannes var markahæsti leikmaður FH í Olís-deildinni í vetur.

„Maður er búinn að vera stefna að þessu núna í dágóðan tíma þannig að þetta er eins og draumur að rætast. Ég hef alltaf stefnt að því að fara út og gera þetta að atvinnu,“ segir Jóhannes sem er nú þegar búinn að fara út og skoða aðstæður.

„Danska deildin er mjög sterk og mörg góð lið að gera góða hluti í Evrópukeppnum og ég tel þetta því líka góðan stökkpall í eitthvað meira,“ segir Jóhannes og bætir við að það hafi hjálpað til að það væri Íslendingur í brúnni úti að stýra liði Holstebro.

„Ég hef bara heyrt góða hluti um Arnór og því mjög spenntur fyrir samstarfinu. Það er smá öryggisnet að vera með Íslending þarna úti í fyrsta skipti í atvinnumennsku og að geta talað við hann á íslensku.“

Rætt var við Jóhannes í Sportpakkanum á Stöð 2 í gærkvöld en hér að neðan má sjá viðtalið.