„Eins og ég sé kominn í úr­slita­keppnina tveimur vikum áður en hún byrjar“

„Eins og venjulega var vörnin stöðug og síðan datt sóknin inn á milli. Vörnin var stöðug eiginlega allan tímann og þeir eru með frábærar skyttur og síðast þegar við spiluðum við KR þá fengu skytturnar mikið pláss og við svöruðum kallinu í dag,“ sagði Finnur Freyr eftir leik og hélt áfram.

„Við náðum að búa til góð skot allan leikinn sem voru ekki alltaf að fara niður síðan kom augnablik þar sem þau fór niður og þannig er þetta hjá okkur. Ef vörnin heldur og ef við tökum fráköst sem við hefðum átt að gera betur í fyrri hálfleik þá erum við góðir.“

KR var tuttugu stigum undir í hálfleik en vann þriðja leikhluta með þremur stigum og Finnur var ánægður með hvernig hans menn hleyptu KR-ingum ekki inn í leikinn.

„Það er kúnst að vera með gott forskot í hálfleik og við erum ekkert svakalega vanir því og við vorum aðeins værukærir og misstum einbeitinguna og fengum nokkrar auðveldar körfur á okkur. Frank Booker kom síðan með orkuna sem við þurftum og tókum þetta.“

Finnur Freyr var að vinna sinn fjórða bikarmeistaratitil sem aðalþjálfari en var lítið að pæla í samanburðinum.

„Ég er orðinn svo gamall að ég man svo stutt aftur og þessi er frábær.“

Núna er aðeins ein umferð eftir af deildarkeppninni og síðan er úrslitakeppnin á næsta leyti. Aðspurður út í tímasetninguna á bikarkeppninni var Finnur ekkert sérstaklega hrifinn af henni en var þó þakklátur þar sem Valur er á töluvert betri stað í dag en í janúar.

„Eftir að það var fjölgað í kvennadeildinni og liðin fóru í átta liða úrslit þar þá var úrslitakeppnin í fyrra miklu lengri heldur en hún hefur verið áður. Mér líður eins og ég sé kominn í úrslitakeppnina tveimur vikum áður en hún byrjar og ég er ekkert rosalega hrifinn af þessu en á sama tíma get ég sagt að ef hún hefði verið í janúar hefðu ansi margir verið frá í meiðslum og ég ætla að fá að vera þakklátur fyrir þessa tímasetningu,“ sagði Finnur Freyr að lokum