„Þá erum við komin út á hálan ís“

Sigmar Guðmundsson, þingmaður Viðreisnar, gagnrýndi Vilhjálm Árnason, formann stjórnskipunar- og eftirlitsnefndar Alþingis, harðlega í aðsendri grein á Vísi í morgun og sagði hann hafa talað ógætilega í fjölmiðlum um mögulega athugun nefndarinnar á byrlunar- eða skæruliðamálinu svokallaða. Vilhjálmur greindi frá því í síðustu viku að lögmaður Páls Steingrímssonar skipstjóra hafi afhent honum gögn í málinu og óskað eftir því að sett verði á fót rannsóknarnefnd til að rannsaka aðkomu Ríkisútvarpsins að málinu.

Eigi að láta fjölmiðla í friði

Sigmundur Ernir Rúnarsson, nefndarmaður Samfylkingarinnar og fyrrum fjölmiðlamaður, tekur undir skrif Sigmars.

„Það er ekki góður bragur á því að alþingismenn fari að rannsaka störf fjölmiðla. Þeir eiga láta fjölmiðla í friði og það eru aðrir til þess bærir aðilar sem eiga að athuga hvort að fjölmiðlar fari eftir siðareglum og þar er siðanefnd Blaðamannafélags Íslands mjög virk, eðlilega.“

Ef málið yrði rannsakað væri um pólitíska ákvörðun að ræða að mati Sigmundar sem skapi slæmt fordæmi. Nefndin væri með rannsókn að seilast inn á valdsvið lögreglunnar.

„Fjölmiðlar fjalla gríðarlega mikið um Alþingi og alþingismenn og ef við ætlum að snúa þessu við, þá erum við komin út á hálan ís og farin að líkjast löndum sem við viljum ekki kannast við.“

Þurfi einnig að skoða aðkomu þingmanna og ráðherra

Málið var til rannsóknar hjá lögreglunni á Norðurlandi eystra í rúm þrjú ár áður en það var látið niður falla. Formaður Blaðamannafélags Íslands fagnað því í síðustu viku að nefndin skoði málið og sagði brýnt að rýna í kjölinn á rannsókn lögreglu gagnvart sex blaðamönnum.

„Ef það á að skoða þetta, þarf að skoða alla anga málsins. Þar á meðal aðkomu þingmanna, ráðherra og aðstoðarmanna ráðherra sem hafa fjallað um þetta mál með ýmsum hætti. Ef það á að skoða þetta, þá þýðir ekki að skoða einn anga málsins sem er pólitískt hagkvæmt fyrir einhver öfl innan Alþingis.“

Snúist ekki um störf blaðamanna

Vilhjálmur sjálfur segir skrif Sigmars vera úr takti við það sem beiðnin til nefndarinnar snýst um. Beiðnin fjalli ekki um blaðamenn eða fréttir og ekki komi til skoðunar að taka fyrir störf og rannsókn lögreglunnar.

„Það er alltaf verið að brigsla okkur um það að vera fjalla um blaðamenn og einstaka fréttir. Það er ekki það sem þetta snýst um. Þetta snýst um aðkomu ríkisstofnunar að því að afla gagnanna og miðla þeim til annarra fjölmiðla en ekki nýta sjálf. Það er ekki verið að biðja okkur um að fjalla um það sem að lögreglan var að rannsaka.“

Sagði Vilhjálmur sem ítrekaði að ekki væri búið að taka afstöðu til þess hvort fjallað verði um málið.

„Síðan var önnur spurning sem við fengum. Hvort að Ríkisútvarpið hafi víðtækari heimildir til að fara inn á síma fólks en lögreglan sem þarf að sækja dómsúrskurð um það,“ segir hann og bætir við að það sé mjög sjaldan gert að nefndin taki fyrir svona mál. Um stóra ákvörðun sé að ræða.

„Við munum fjalla um þetta og munum sjá hvort við bíðum eftir hver ákvörðun ráðherra verður í þessu og hvort við biðjum hann að upplýsa nefndina um það. Því hann hefur sagst ætla skoða málið.“