Handbolti

Snorri Steinn um Hauk: Mér finnst hann hafa valið rétt

Óskar Ófeigur Jónsson skrifar
Snorri Steinn Guðjónsson hefur trú á því að Haukur Þrastarson sé að gera rétt með því að færa sig yfir í þýsku deildina.
Snorri Steinn Guðjónsson hefur trú á því að Haukur Þrastarson sé að gera rétt með því að færa sig yfir í þýsku deildina. Getty/Marco Steinbrenner

Snorri Steinn Guðjónsson, þjálfari íslenska karlalandsliðsins í handbolta, fagnar félagsskiptum landsliðsmannsins Hauks Þrastarson sem er að fara frá Rúmeníu til þýska stórliðsins Rhein-Neckar Löwen.

Valur Páll Eiríksson spurði Snorra út í félagsskiptin á æfingu landsliðsins í gær en Haukur verður í eldlínunni í dag þegar íslensku strákarnir geta tryggt sig inn á Evrópumótið.

„Ég sem landsliðsþjálfari er mjög ánægður með þau og held að þetta sé hárrétt skref hjá honum að færa sig í Rhein-Neckar Löwen og í þessa deild. Ég kom inn á það og ræddi það líka við Hauk,“ sagði Snorri Steinn.

Haukur hefur verið að spila með Meistaradeildarliði Dinamo Búkarest en lék áður með pólska liðinu Kielce í fjögur ár. Haukur verður 24 gamall í næsta mánuði.

„Þetta er náttúrulega bara hans ákvörðun og hans ferill sem hann er að taka ákvörðun um. Mér finnst hann hafa valið rétt og er kominn í það umhverfi sem ég vil sjá hann í,“ sagði Snorri Steinn.

„Ég vil sjá sem flesta leikmenn sem eru í landsliðinu vera í svona umhverfi. Ég er ánægður fyrir hans hönd og spenntur að sjá hvernig honum reiðir að þar,“ sagði Snorri Steinn.

„Ef hann er heill heilsu og í formi þá held ég að það verði mjög gaman að fylgjast með honum í Rhein-Neckar Löwen,“ sagði Snorri Steinn eins og sjá má hér fyrir neðan.

Snorri Steinn sjálfur þekkir vel til hjá Rhein-Neckar Löwen því hann spilaði með liðinu tímabilið 2009–2010.

Klippa: „Ég held að þetta sé hárrétt skref hjá honum“



Fleiri fréttir

Sjá meira


×