Allir víga­menn drepnir og gísla­tökunni lokið

Fréttastofa Reuters hefur þetta eftir talsmanni pakistanska hersins. Vígamenn frá samtökunum Balochistan Liberation Army, eða BLA, stöðvuðu lest þar sem á fimmta hundrað manns voru um borð í gær og tóku fjölda þeirra í gíslingu. Samtökin hafa barist fyrir frelsi frá yfirvöldum í Islamabad-héraði. 

Fjórir hermenn og 21 gísl létust meðan á gíslatökunni stóð, samkvæmt upplýsingum frá pakistanska hernum. Áður en þær upplýsingar bárust sögðust BLA hafa drepið fimmtíu manns í gíslatökunni. 

Samtökin hótuðu að hefja aftökur á gíslunum ef pakistönsk yfirvöld létu ekki af hendi pólitíska fanga sem eru í haldi vegna tengsla við samtökin innan tveggja sólarhringa frá því að gíslatakan hófst. 

Fyrr í dag var greint frá því að tekist hefði að frelsa um 190 gísla og í leið hafi brotist út átök á svæðinu. Embættismenn sögðu það hafa reynst mjög erfitt að frelsa gíslana, meðal annars vegna þess að vígamenn klæddir sprengjuvestum hafi setið meðal þeirra.