Tveir kaflar að Látra­bjargi lag­færðir fyrir almyrkvann

Í fréttum Stöðvar 2 var sýnt hvar á jörðinni menn verða svo heppnir að upplifa almyrkvann. Þeir þykja vera ein tilkomumesta sýning náttúrunnar þegar tunglið gengur fyrir sólina og myrkur verður um miðjan dag. Þessi almyrkvi mun sjást á mjórri rönd sem liggur um Grænland, Ísland, Atlantshaf, Portúgal, norðanverðan Spán og að eyjunni Mallorca.

Síðast sást almyrkvi á Íslandi 30. júní árið 1954, en bara syðst á landinu, varði lengst í Mýrdal og í Vestmannaeyjum. Það er til marks um hvað þetta er sjaldséð fyrirbæri að síðast sást almyrkvi í Reykjavík árið 1433, fyrir nærri sexhundruð árum, og næsti almyrkvi í Reykjavík verður árið 2245, eftir 220 ár.

Sólmyrkvinn á næsta ári verður síðdegis þann 12. ágúst. Hann sést sem deildarmyrkvi allsstaðar á Íslandi í um tvær klukkustundir en bara sem almyrkvi vestast landinu og mislengi eftir stöðum, víðast í kringum eina mínútu. Til dæmis á Lækjartorgi í Reykjavík í 59 sekúndur, í Mosfellsbæ í 30 sekúndur en lengur á Suðurnesjum; í Sandgerði til dæmis í eina mínútu og 45 sekúndur.

En það eru utanvert Snæfellsnes og Vestfirðir sem eru mest spennandi. Í Ólafsvík sést almyrkvinn í tvær mínútur og þrjár sekúndur, á Ísafirði í eina mínútu og 31 sekúndu en á Látrabjargi mun almyrkvinn standa yfir í tvær mínútur og þrettán sekúndur.

Lengst verður hann sýnilegur í tvær mínútur og átján sekúndur í hafinu skammt suðvestan við Látrabjarg, undan Breiðafirði.

Það er því búist við því að Bjargtangar, vestasti oddi Íslands, verði heitasti staðurinn á Íslandi þann 12. ágúst á næsta ári. Og vonandi að mannfjöldinn fari varlega á brún 440 metra hás Látrabjargsins þegar þar verður myrkur.

Og sennilega verða fleiri ferðamenn á jörðinni Látrum en þar hafa nokkurn tímann sést áður en þetta gamla eyðiþorp er núna sumarhúsabyggð.

En mesta áskorunin verður vegurinn út á Látrabjarg og hann er vægast sagt vondur. Þetta er malarvegur, mjór og holóttur. Átta ár eru liðin frá því síðast var lagt bundið á hluta vegarins um sunnaverðan Patreksfjörð. Þarna er ennþá 35 kílómetra langur malarvegur síðasta hlutann að Látrabjargi.

En núna er Vegagerðin búin að bjóða út endurbætur og lagningu bundins slitlags á tvo kafla Örlygshafnarvegar. Við Látra koma nærri tveir kílómetrar slitlags, þegar vegurinn verður færður út fyrir þorpið, og síðan einnig fjórir kílómetrar við Sauðlauksdal. 

Þessum endurbótum á að ljúka þann 10. ágúst á næsta ári, tveimur dögum fyrir almyrkvann. En þá verða samt ennþá 29 kílómetrar eftir ómalbikaðir að Látrabjargi.

Hér má sjá frétt Stöðvar 2: