Sviptir hulunni af þrettánda barni Musks

Í yfirlýsingu sem hún birti á X, samfélagsmiðli Musks, á föstudaginn sagðist hún ekki hafa ætlað að opinbera faðerni barnsins en að fjölmiðlar væru farnir að ganga á hana. Bað hún fjölmiðla um að virða einkalíf barnsins.

St. Clair er 26 ára gömul og Elon Musk er 53. Hann á nú þrettán börn, sem vitað er um, með fjórum konum. Hann á fimm börn með Justine Wilson, fyrrverandi eiginkonu hans, þrjú börn með kanadísk söngkonunni Claire Elise Boucher, eða Grimes, og þrjú börn með Shivon Zilis, yfirmanni Neuralink, fyrirtækis í hans eigu.

Mörg af þessum börnum hafa fæðst á undanförnum fimm ár.

„Whoa“

Musk hafði ekki tjáð sig um fregnirnar fyrr en í gær og þá gerði hann það á X, við færslu þar sem því var haldið fram að St. Clair hefði varið hálfum áratug í að reyna að eignast barn með auðjöfrinum.

„Whoa,“ skrifaði Musk við skjáskot af ummælum St. Clair frá árinu 2020 þar sem hún skrifaði að hún þyrfti að komast í samband við Musk vegna brúðkaupstilboðs. Musk hefur ekki gengist við barninu.

Hún skrifaði svo eigið svar við ummæli Musk, þar sem hún sagði: „Elon, við erum búin að reyna að ná í þig í nokkra daga og þú hefur ekki svarað. Hvenær ætlar þú að svara okkur í stað þess að svara opinberlega dylgjum frá manni sem birti nýverið mynd af mér á nærfötunum frá því ég var fimmtán ára gömul?“

Hún eyddi svo svarinu seinna meir og sagðist ætla að taka sér pásu frá X.

Upplýsingafulltrúi hennar sagði að hún og Musk hefðu unnið að samkomulagi um uppeldi barnsins. Beðið sé eftir því að hann viðurkenni hlutverk sitt og ljúki við gerð samkomulagsins eins fljótt og auðið sé.

Hélt leynd yfir óléttunni

Í viðtali við New York Post segir St. Clair að samband hennar og Musks hafi byrjað á skilaboðasendingum á X. Hann hafi verið fyndinn og jarðbundinn en á þeim tíma segist hún ekki hafa haft mikinn áhuga á Musk, í sjálfu sér.

Hún segir að skömmu síðar hafi hún verið beðin um að ferðast til San Francisco og hitta Musk, sem hún gerði. Þau hittust fyrst í höfuðstöðvum X, sem þá hét Twitter, þegar hún var 24 ára og hann 51, þar sem hún tók viðtal við hann.

Seinna meir varð hún ólétt en St. Clair segir að sér hafi verið skipað að halda barninu leyndu. Hún hafi verið alein alla óléttuna og upplifað mikla einangrun. Þá segir í grein NY Post að samskipti milli hennar og fjármálastjóra Musks sýni að hann hafi ekki viljað koma fram á fæðingarvottorði barnsins.

Eftir að hún eignaðist barnið myndaðist umræða á netinu um að Musk ætti það og St. Clair segir að öfgafullir aðdáendur auðjöfursins hafi byrjað að senda sér hótanir og hótað barni hennar. Þeir hafi kallað hana hóru.