Búið að loka flug­brautinni vegna trjá­gróðurs: Vonar að ekki komi upp al­var­leg at­vik

Lokunin á sér nokkurn aðdraganda en borgin og flugmálayfirvöld hafa deilt um þann fjölda trjáa sem þurfi að fella til að tryggja öryggi flugumferðar um Reykjavíkurflugvöll.

„Í rauninni ræðst notkun flugbrauta mjög mikið af veðri og vindáttum. Við vonum bara að það komi ekki til þess að það komi upp einhver alvarleg atvik út af því að það er ekki hægt að nota þessa flugbraut,“ segir Sigrún Björk Jakobsdóttir, framkvæmdastjóri Isavia innanlandsflugvalla í samtali við fréttastofu. Hún vonast til að geta opnað flugbrautina aftur sem allra fyrst.

„Við erum í rauninni bara að bíða eftir aðgerðaáætlun frá Reykjavíkurborg varðandi þessar trjáfellingar og hvað við getum gert þetta á stuttum tíma, þetta þarf að gerast mjög hratt,“ bætir Sigrún við.

Lokunin hefur einnig áhrif á sjúkraflug og eftir stendur einungis norður-suðurbraut flugvallarins. Tilskipun Samgöngustofu gildir til 5. maí næstkomandi og hefur stofnunin gefið út að ráðstöfuninni verði aflétt þegar staðfest hafi verið að aðflugsleiðin sé án hindrana eða Isavia viðurkennt „mögulegar mildunarráðstafanir.“

Krafan kom borgarstjóra á óvart

Isavia segir að borgin hafi ekki staðið við að fella tré sem orðin væru of há fyrir aðflug að austur-vestur flugbraut Reykjavíkurflugvallar en borgin segist hafa staðið við sitt.

„Það sem ég hef sagt um þessi tré er að við fellum þau tré sem þarf til að tryggja öryggi. Við höfum gert það, nú bara síðast í september samkvæmt þeim viðmiðunum sem við höfum gert á undanförnum árum varðandi tré sem vaxið hafa upp í þennan aðflugsgeira,“ sagði Einar Þorsteinsson borgarstjóri í Samtalinu hjá Heimi Má í lok janúar.

Síðan hafi borist bréf frá Isavia þar sem farið væri fram á miklu umfangsmeira skógarhögg en áður og þá út frá nýjum viðmiðunum.

„Ég hef ekki alveg fengið rök fyrir þessum nýju viðmiðunum, þessu nýja mati,“ bætti borgarstjóri við. Reykjavíkurborg væri stjórnvald sem þyrfti að byggja ákvarðanir á lögum og reglum. Það væri hverfisvernd á þessum trjám og svæðið skilgreint sem borgargarður.

„Til þess að við fáum ekki á okkur kærur frá einhverju öðru stjórnvaldi, umhverfisstofnun, almenningi, eða félagasamtökum vegna þess að við séum að ganga of hart fram gagnvart vernduðu svæði, þá verðum við einfaldlega að vera með stjórnsýsluna í lagi,“ sagði borgarstjóri. Krafa um að fella 2.900 tré hafi komið sér dálítið á óvart.

„Því hún var ekki í anda þeirra samtala sem ég hafði átt við Isavia um leið og ég heyrði að það stæði til að loka brautinni.“

Ekki sé hægt að tryggja hindranalaust aðflug

Í tilskipun sem Samgöngustofa gaf út á dögunum um lokun umræddrar flugbrautar segir að mælingar í október síðastliðnum staðfesti að trjágróður hafi vaxið upp í hindranafleti Reykjavíkurflugvallar og því sé ekki hægt að tryggja hindranalaust aðflug og flugtak á umræddri flugbraut 13/31. Í tilskipuninni segir enn fremur:

„Hvorki Isavia innanlandsflugvöllum né Samgöngustofu hefur tekist að fá hindranir fjarlægðar þrátt fyrir skýr ákvæði Skipulagsreglna Reykjavíkurflugvallar og hefur Reykjavíkurborg verið veittur frestur til 17. febrúar nk. til að upplýsa Samgöngustofu um hvernig staðið verður að uppfyllingu þeirra krafna.

Samgöngustofa beinir þeim fyrirmælum hér með til Isavia innanlandsflugvalla að takmarka notkun flugbrautar 13/31 þannig að flugbrautin sé ekki notuð til flugtaks og lendinga sem reynir á þá hindranafleti sem ekki eru hindranafríir. Þetta felur í sér að loka skal fyrir lendingar á flugbraut 13 og flugbraut 31, og að loka skal fyrir flugtök á flugbraut 13.

Með vísan í fyrri samskipti þá ítrekar Samgöngustofa að bannið nær einnig til sjúkraflugs. Nota má flugbraut 31 til flugtaks og til aksturs loftfara og ökutækja.“