„Held þeir vilji hafa þetta á Sam­fylkingarpóstinum“

Samkvæmt heimildum Vísis gefur Útgáfufélagið ekkert fyrir Mannlíf í núverandi mynd, það tekur útgáfuna yfir og tryggir stöðugildi tveggja blaðamanna sem þar hafa starfað. 

Til stendur að hefja vefinn til fyrri virðingar

Nokkur styr hefur staðið um þessi kaup og hefur mörgum áskrifendum Heimildarinnar litist misvel á kaupin og telja þau skaða trúverðugleika Heimildarinnar.

„Já, Reynir hættir um leið og þetta er gengið í gegn. Vörumerkið er bara tekið yfir og þá þeir tveir starfsmenn sem þar eru,“ segir Elín G. Ragnarsdóttir stjórnarformaður. Um er að ræða blaðamennina Björgvin Gunnarsson og Brynjar Birgisson.

Elín segir að til standi að hefja vefinn aftur til fyrri virðingar en átök í hluthafahópnum hafi staðið því fyrir þrifum.

„Þetta eru annars vegar starfsmenn Stundarinnar [sem sameinaðist Kjarnanum á sínum tíma og úr varð Heimildin] og svo hins vegar fjárfestar sem komu frá Kjarnanum,“ segir Elín.

Ágreiningur innan hluthafahópsins

Hún er hér að vísa til fjárfestanna Hjálmars Gíslasonar og Vilhjálms Þorsteinssonar sem komu inn í hópinn við sameininguna. Þeir áttu hlut í Kjarnanum. Þeir hafa viljað selja sig út en að sögn Elínar hafa þeir óraunhæfar væntingar um kaupverð. Elín segist ekki vera hluthafi heldur gegni hún aðeins stjórnarformennsku.

„Þeir hafa verið með allskonar skoðanir, hvernig þeir vilja hafa þetta, stjórnina öðruvísi og ég veit ekki hvað. Ég held að þeir vilji bara hafa þetta á Samfylkingarpóstinum. Eða ég veit ekki hvað þeir vilja,“ segir Elín og kímir. Hún er stödd sem stendur úti á Spáni og nýtur þess að vera í góðu veðri.

En meirihlutinn ræður og það eru þá starfsmenn gömlu Stundarinnar. Að sögn Elínar stendur til að breyta Mannlífi, bæði að útliti og sem og innihaldi, bæta við starfsfólki og ráða nýjan ritstjóra.

„Vera með meiri og hraðari fréttir; þetta verður auglýsingadrifinn og skemmtilegur vefur. Það eru allskonar hugmyndir í gangi,“ segir Elín.

Stjórnin hefur fyrir sína parta samþykkt kaupin á Mannlífsvefnum en einhver formsatriði eru þó sem þarf að ganga frá svo sem senda þessar fyrirætlanir til samkeppniseftirlitsins.

Verulegar breytingar á ritstjórn Heimildarinnar

Veruleg umskipti hafa orðið í blaðamannagengi Heimildarinnar að undanförnu. Þannig hafa svo gott sem allir þeir starfsmenn sem komu yfir á blaðið með Kjarnanum hætt störfum við blaðið. Þar munar líklega mest um Þórð Snæ Júlíusson ritstjóra, sem sagði upp störfum og kom þar ýmislegt til. 

Í nýútkomnum Blaðamanninum, tímariti Blaðamannafélags Íslands, segir hann að það hafi meðal annars verið vegna máls sem kennt hefur verið við Skæruliðadeild Samherja, hann mátti sæta því að hafa um tveggja ára skeið mátt sæta því að vera með stöðu sakbornings við rannsókn lögreglunnar á Norðurlandi eystra. 

Þá hefur Vísir heimildir fyrir því að samstarf hans og samritstjóra hans Ingibjargar Daggar Kjartansdóttur og Jóns Trausta Reynissonar hafi verið orðið stirt. Þórður Snær er nú orðinn framkvæmdastjóri þingflokks Samfylkingarinnar og Arnar Þór Ingólfsson, helsti samverkamaður hans og þjáningarbróðir í Skrímsladeildarmálinu, er orðinn starfsmaður þingflokksins. Ingi Freyr Vilhjálmsson hætti einnig störfum og fór yfir á Ríkisútvarpið, Helgi Seljan hætti einnig óvænt störfum og munar um minna. Hann er nú kominn til Rauða krossins, þar sem hann annast um fíkla auk þess sem hann sinnir verkefnum fyrir RÚV.

Þá hefur Erla María Markúsdóttir blaðamaður einnig sagt upp störfum á Heimildinni auk Sunnu Óskar Logadóttur, sem stóð vaktina sem fréttastjóri Mbl.is áður en hún færði sig til Kjarnans; hún er að vinna uppsagnarfrest sinn á blaðinu.