Irv Gotti er látinn

The Hollywood Reporter greinir frá andláti hans. 

Dánarorsök Gotti liggur ekki fyrir en hann hafði fengið nokkur heilablóðföll á síðustu árum og hafði jafnframt glímt við sykursýki. Gotti lætur eftir sig þrjú börn sín: Angie, Sonny og Jonathan Wilson.

Gotti, sem hét réttu nafni Irving Domingo Lorenzo Jr., fæddist 26. júní 1970 í Hollis-hverfi í Queens. Hann hóf feril sinn sem tónlistarframleiðandi undir nafninu DJ Irv og framleiddi til að mynda Jay-Z-lagið „Can I Live“ á fyrstu plötu rapparans, Reasonable Doubt, 1996. 

Í lok tíunda áratugarins og í upphafi fyrsta áratugar þessarar aldar framleiddi Gotti lög fyrir DMX, Ashanti, Ja Rule, Jennifer Lopez og Aaliyuh. Framleiðslustíll Gotti einkenndist af blöndu hipphopp-takta og R&B-melódía.

Morð hf. og vandræði með FBI

Gotti starfaði sem A&R-maður hjá Def Jam og átti stóran þátt í því að fá DMX, Jay-Z og Ja Rule til liðs við útgáfuna.

Gotti fékk leyfi hjá stjórnendum Def Jam til að stofna eigin útgáfu, Murder Inc. Records, með bróður sínum, Chris Lorenzo. Útgáfan hét í höfuðið á glæpahópnum Murder Inc. sem starfaði frá 1929-1941 og gaf út plötur fyrir Ja Rule og Vanessu Carlton en einnig plötur Gotti sjálfs.

Murder Inc. lentu í vandræðum 2003 þegar Alríkislögreglan réðist inn á skrifstofur útgáfunnar vegna meintra tengsla hennar við eiturlyfjabaróninn Kenneth „Supreme“ McGriff. Gotti og Chris höfðu kynnst McGriff 1994 og haldið góðu sambandi við kauða. Málinu var vísað frá 2005 en skaðaði orðspör útgáfunnar allverulega.

„Def Jam hefur misst einn af sínum mest skapandi hipphopp-hermönnum,“ sagði Lyor Cohen, sem var framkvæmdastjóri útgáfunnar frá 1988 til 2004.

„Þegar við vorum á hnjánum kom hann með hitann og bjargaði okkur. Hann er úr fallegri fjölskyldu úr Queens og það er heiður og forréttindi að hafa þekkt hann,“ sagði Cohen.