Best klæddu, flippuðustu og fáklæddustu á Grammy

Dóra Júlía Agnarsdóttir skrifar 3. febrúar 2025 12:04

Stjörnurnar fóru nýstárlegar leiðir í klæðaburði fyrir Grammy hátíðina. Bianca Censori, hér í miðjunni, var fáklæddasta stjarnan á dreglinum. Samsett/Getty

Stærstu stjörnur í heimi voru óhræddar við að taka áhættu á rauða dreglinum í gær þegar Grammy verðlaunahátíðin fór fram í 67. skipti. Ef marka má fataval stjarnanna má gera ráð fyrir að tískan í ár fari bæði í ögrandi og listrænar áttir.

Chappell Roan

Rísandi stórstjarnan Chappell Roan vekur alltaf athygli á dreglinum fyrir einstakan og mjög svo listrænan persónulegan stíl. Hún hlaut verðlaun í flokknum Besti nýi listamaðurinn og skein skært í kjól frá Jean Paul Gaultier. Kjóllinn er sannkallað listaverk og á pilsinu má sjá endurgerð af sögulegum ballerínuverkum Edgar Degas.

Beyoncé

Ein stærsta stjarna heimsins Beyoncé lét sig ekki vanta á Grammy hátíðina og vann til verðlauna í flokknum besta platan fyrir Cowboy Carter. Hún glitraði í gylltum kjól frá einum nettasta tískuhönnuðinum Schiaparelli.

Bianca Censori

Fyrirsætan Bianca Censori hefur líklega komist nálægt því að brjóta internetið með klæðaburði sínum í gærkvöldi. Hún klæddist gegnsæjum stuttum ljósum kjól og engu undir. Með henni var Kanye West eiginmaður hennar.

Julia Fox

Fyrirsætan og leikkonan Julia Fox mætti í gegnsæju fitti, nærfötum undir og með gula uppþvottahanska.

Taylor Swift

Ein vinsælasta tónlistarkona fyrr og síðar Taylor Swift skein skært í rauðum stuttum kjól frá breska tískuhúsinu Vivienne Westsood. Rauður er einn hennar uppáhalds litur og hefur hún meðal annars gefið út plötu sem heitir Red.

Jaden Smith

Tónlistarmaðurinn Jaden Smith klæddist svörtum jakkafötum frá Louis Vuitton og var með heilt hús á hausnum.

Willow Smith

Willow Smith rokkaði glitrandi svört nærföt við svartan jakka.

Jourdin Pauline

Það var gul viðvörun á dreglinum hjá Jourdin Pauline. Hún er glæsileg í gulum þröngum glansandi kjól með hanska í stíl. Gulur hefur ekki verið áberandi í hátískunni að undanförnu en það er spurning hvort hann fari að láta meira á sér kræla á næstu misserum.

Markos D1 og snákurinn

Tónlistarmaðurinn og framleiðandinn Markos D1 elskar snáka og lét það svo sannarlega skína í gegn í gær. Nýtt trend: Að rokka glitrandi steinanað snák yfir axlirnar.

Markos D1 elskar snáka.Frazer Harrison/Getty Images

Sabrina Carpenter

Ein vinsælasta tónlistarkonan í dag Sabrina Carpenter hlaut Grammy verðlaun fyrir besta popp flutninginn á laginu Espresso. Hún var úti lengi í gær því hún er söngkona (I'm working late, 'cause I'm a singer eins og segir í lagi hennar) og var stórglæsileg í ljósbláum fjaðurkjól frá JW Anderson.

Troye Sivan

Poppstjarnan Troye Sivan geislaði í satín Prada jakkafötum í fjólubláum tónum með fjólubláan trefil við.

Sierra Ferrell

Sierra Ferrell vann til ferna verðlauna í gær og brosti fyrir myndavélarnar með fangið fullt af verðlaunum. Sierra skein skært í rokókkó kjól frá Jeffrey Kelly Designs.