„Fram­haldið er erfiðara og skemmti­legra“

„Ég er ánægður með liðið og mér fannst við gera þetta vel. Strákarnir sýndu fagmennsku og einbeitingu eins og ég kallaði eftir. Kom smá kafli í fyrsta leiknum sem var ekki nógu góður en það slapp alveg. Framhaldið er erfiðara og skemmtilegra.“

Það er kórrétt hjá landsliðsþjálfaranum því í kvöld bíður leikur við Slóvena. Frábært lið sem náði fjórða sæti á ÓL á síðasta ári. Þetta er í raun fyrsti leikur í milliriðli og afar mikilvæg stig í boði.

„Það er hellingur sem þarf að varast þar. Mér finnst þeir vera frábært lið sem spilar skemmtilegan handbolta. Ég var mjög hrifinn af þeim á ÓL í sumar þar sem þeir náðu frábærum árangri,“ segir Snorri Steinn sem ber eðlilega mikla virðingu fyrir sterku liði.

„Það er mikið í gangi hjá þeim. Margir leikmenn og rúllað vel á liðinu. Það er hellingur sem við þurfum að fara yfir. Þetta er öðruvísi undirbúningur og reynir á alla að meðtaka þetta á sem stystum tíma.“

„Ég legg töluverða áherslu á varnarleikinn okkar fyrir leikinn því það er mikið í gangi hjá þeim og margir varíantar af mörgum kerfum. Ólíkir leikmenn inn á milli. Við munum fara yfir allt sem þarf og ég bæti við fundum ef við þurfum þess.“

Leikur Íslands og Slóveníu hefst klukkan 19.30 í kvöld og verður í beinni textalýsingu á Vísi.