Eftir­maður Norman yfir LIV-mótaröðinni fundinn

LIV tilkynnti í gær að Scott O'Neill hefði verið ráðinn sem framkvæmdastjóri mótaraðarinnar. Hann var áður forstjóri Merlin Entertainments sem rekur fjölda skemmtigarða eins og Lególand og Harris Blitzer Sports & Entertainment sem á meðal annars NBA-liðið Philadelphia 76ers og NHL-liðið New Jersey Devils.

O'Neill tekur við starfinu af Norman, ástralska tvöfalda risamótssigurvegaranum, sem var einn helsti hvatamaður þess að ný golfmótaröð yrði stofnuð til höfuðs bandarísku PGA-mótaröðinni. Forsvarsmenn LIV hafa ekki sagt hvaða hlutverk Norman muni hafa héðan í frá, aðeins að hann verði áfram viðriðinn mótaröðina.

Sádiarabíski þjóðarsjóðurinn PIF stofnaði LIV-mótaröðina árið 2021 eftir að hann hafði ekki erindi sem erfiði að kaupa sig inn í PGA-mótaröðina. Hleyptu Sádar upp golfheiminum með því að lokka suma af bestu kylfingum heims burt af PGA- og DP-mótaröðunum með því að bjóða þeim gull og græna skóga fyrir það eitt að keppa í nýju mótaröðinni.

Svo virtist sem að vopnin hefðu verið slíðruð sumarið 2023 þegar tilkynnt var um sameiginlega viljayfirlýsingu PGA-mótaraðarinnar og PIF um samstarf. Ekkert hefur þó ekkert orðið úr þeim vilja og LIV stal John Rahm, þá einum allra besta kylfingi heims, aðeins nokkrum mánuðum síðar.

Samningaviðræður eru engu að síður enn sagðar standa yfir á bak við tjöldin á milli forkólfa PGA-mótaraðarinnar og sádiarabíska fjárfestingasjóðsins sem á LIV um einhvers konar samstarf eða samruna. 

Norman er af mörgum talinn hafa verið ljón í vegi samkomulags þar sem framferði hans undanfarin ár hefur ekki aflað honum mikilla vinsælda hjá PGA-kylfingum í því sem hefur á tíðum verið hatrömm samkeppni á milli mótaraðanna.

Norman mætti meðal annars óboðinn á Masters-mótið í fyrra og fylgdi þar ráshópi Rorys McIlroy, helstu stjörnu PGA-mótaraðarinnar og málsvara í stríðinu við LIV. Fjöldi sjónarvotta sagði frá því að Norman hefði virst vísvitandi reyna að fá McIlroy til þess að taka eftir sér og almennt hegðað sér á undarlegan hátt.