Segir minni samningsvilja hjá ríkinu en Kennarasambandinu

Samninganefnd sveitarfélaganna, sem er með grunnskóla og tónlistarskóla á sínu forræði, mun sitja fundinn. Samninganefnd ríkisins, sem er með framhaldsskóla á sínu forræði, verður ekki viðstödd.

Ef samningar nást ekki fyrir mánaðamót halda verkfallsaðgerðir áfram. Að sögn Magnúsar Þórs Jónssonar formanns Kennarasambandsins hefjast verkföll í 21 skóla, fjórtán leikskólum og sjö grunnskólum, þann 1. febrúar ef ekki næst að semja. 

„Við höfum ekki ennþá fundað með samninganefnd ríkisins og því miður er ég á því að þau séu kannski lengra frá samkomulagi eða alvöru samningsvilja þeim megin heldur en sambandsmegin,“ segir Magnús.

Hann segir sambandið byggja á því á markmiði sem snúi að fullnustu samkomulags frá 2016 sem ríkið er aðli að. Fulltrúar í nýrri ríkisstjórn hafi gefið það upp að þeir teldu tímabært að samkomulagið væri fullnustað.

Í samkomulaginu felist að laun kennara, ráðgjafa og stjórnenda í grunn-, leik-, tónlistar- og framhaldsskólum séu jafnsett við laun á almennum og opinberum markaði. 

Formaður samninganefndar sveitarfélaga sagði fréttastofu í vikunni að viðræðurnar hefðu helst strandað á launakröfum Kennarasambandsins. Aðspurður hvort launakröfur þeirra væru óraunhæfar segir Magnús þær sanngjarnar í ljósi áðurnefnds samkomulags. 

„Við höfum alveg verið skýr með það frá upphafi að það merki markaðarins sem hefur svolítið verið talað um myndi ekki duga til þess að gera KÍ samning. Og núna þurfum við bara að einbeita okkur að því verkefni, að finna leið til þetta markmið okkar verði sett í þann farveg sem þetta samkomulag á að gefa okkur.“

Hann bendir á aukið hlutfall ófaglærðra kennara í stofnunum sambandsins. 

„Við verðum að stoppa þessa blæðingu sem er út úr kerfunum. Og það verður ekkert gert nema ef þeir sem standa ábyrgir gagnvart kerfunum verði með okkur í þessari vegferð sem við teljum okkur eiga mikinn hljómgrunn meðal fólks. En við erum því miður aftur að lenda á þeim stað að þurfa að lyfta hnefanum til þess að láta hlusta á okkur. Við getum ekki horft upp á það að fólkinu sé sama um hvernig kerfin okkar virka.“