„Himin­lifandi“ eftir að hafa landað fyrir­liða Fylkis

Eva Rut hefur verið fyrirliði Fylkis síðustu þrjú ár og á heimasíðu Þórs/KA er henni lýst sem kröftugum miðjumanni, líkamlega sterkum, sem geti látið til sín taka jafnt í vörn og sókn. Þá sé hún með góðan leikskilning, marksækin og með frábæra spyrnutækni.

Eva Rut, sem er 23 ára, lék 23 leiki fyrir yngri landslið Íslands og skoraði í þeim fimm mörk. Hún kemur upphaflega úr Aftureldingu en hefur leikið með Fylki undanfarin fimm tímabil.

Fylkir féll úr Bestu deildinni á síðustu leiktíð en Eva Rut lék 54 leiki fyrir liðið í efstu deild, og skoraði í þeim 12 mörk. Þá hefur hún leikið 46 leiki í næstefstu deild og skorað 14 mörk, og hún lék ung 16 leiki í C-deild með Aftureldingu, og skoraði tvö mörk.

„Mikill fengur fyrir okkur“

„Við erum himinlifandi með að fá Evu til okkar í Þór/KA,“ segir Jóhann Kristinn Gunnarsson þjálfari Þórs/KA, á heimasíðu liðsins.

„Eva er fjölhæf með mikla hæfileika og reynslu sem á eftir að smellpassa inn í okkar lið. Ég er sannfærður um að Eva á eftir að taka næsta skref á sínum ferli hérna hjá okkur ásamt því að gera liðið okkar enn betra. Þetta er mikill fengur fyrir okkur og við hlökkum mikið til að vinna með henni,“ segir Jóhann.