Vísir greindi frá því í gær að formenn málefnanefnda Sjálfstæðisflokksins hefðu rætt hugmyndir um að fresta landsfundi, sem fyrirhugaður er um mánaðamótin febrúar/mars. Haft var eftir Jens Garðari Helgasyni, formanni atvinnuveganefndar flokksins og meðlimi í miðstjórn, að brugðið gæti til beggja vona með veðurfar á þessum árstíma. Ef fundinum yrði frestað yrði það líklega fram á haust.
Fréttin vakti töluverð viðbrögð, en meðal þeirra sem hafa kvatt sér hljóðs og sagt óráðlegt að fresta landsfundi um of eru Áslaug Arna Sigurbjörnsdóttir og Diljá Mist Einarsdóttir. Áslaug hefur verið orðuð við formannsframboð, láti Bjarni Benediktsson staðar numið í embætti, og Diljá sagði í dag að hún hefði íhugað framboð til varaformanns eða ritara.
Þá sagðist formaður Sambands eldri sjálfstæðismanna telja að um „dæmigert baktjaldamakk“ væri að ræða, alls ótengt veðurfari í febrúar.
Tíminn fór í annað
Jens Garðar, sem tók sæti á þingi fyrir Sjálfstæðisflokkinn eftir síðust kosningar, er einn þeirra sem lagt hefur til að fresta fundinum. Hann segir fleiri ástæður að baki en veðrið.
„Tími sem átti að fara bæði í málefnastarf, og að undirbúa landsfund sem er allt að 1.500 manna samkoma í þrjá daga, fór í kosningarnar. Síðan taka við hátíðarnar,“ segir Jens í samtali við fréttastofu.
Dagsetningin hafi verið sett með það í huga að vera upptaktur að prófkjörum í aðdraganda kosninga, sem boðað var til fyrr en ráðgert var. Umræða um aðgengi landsbyggðarfólks að fundinum hafi einnig áhrif.
„Það er allra veðra von í febrúar og það eru ekki margir dagar síðan íbúar Selfoss, Þorlákshafnar og Hveragerðis hefðu ekki komist á landsfund því Þrengslin og Hellisheiðin voru lokuð. Það er alveg möguleiki á því í febrúar líka.“
Óþarfi að funda að vetri ef ekki er ástæða til
Síðustu fimm landsfundir Sjálfstæðisflokksins hafa farið fram að vetrarlagi, á tíma þar sem sannarlega má ætla að hafi verið allra veðra von. Árið 2022 fór hann fram í upphafi nóvember, 2018 um miðjan mars, 2015 í seinni hluta október, 2013 í seinni hluta febrúar, og 2011 um miðjan nóvember.
Jens Garðar segir vissulega rétt að fundir hafi áður verið haldnir að vetri til.
„Ég sé bara ekki ástæðuna til þess að gera það akkúrat núna, þegar það er ekki þörf á því og við getum haldið landsfundinn á öðrum tíma á næsta ári.“
Verði að snúa vörn í sókn
Guðlaugur Þór Þórðarson, sem veitti Bjarna Benediktssyni mótframboð til formanns á landsfundi 2022, segir ljóst að væntingar séu um að landsfundur verði haldinn á þeim tíma sem lagt hefur verið upp með.
„Einfaldlega vegna þess að það er verkefni okkar að snúa vörn í sókn. Það er ekki ásættanlegt að staðan sé eins og hún er og við vitum það,“ segir Guðlaugur.Sjálfstæðisflokkurinn hlaut sína lökustu kosningu í sögunni í síðustu alþingiskosningum, og er í stjórnarandstöðu í fyrsta sinn frá kjörtímabilinu 2009-2013.
Gefur ekkert upp um næstu skref
Guðlaugur telur að sterk rök verði að hníga til þess að fresta fundinum, önnur en íslenskt vetrarveður.
„Það hefur alltaf legið fyrir að febrúar er í febrúar, og verður það áfram. Það eitt og sér geta ekki verið rök.“
Guðlaugur gefur ekkert upp um fyrirætlanir sínar á landsfundi, hvort hann sækist aftur eftir formennsku í flokknum.
„Það kemur auðvitað í ljós þegar nær dregur.“
