Draumur eða mar­tröð Ís­lands á EM? „Þær eru rugl góðar“

Eftir magnað sumar þar sem Ísland vann sigra gegn Þýskalandi, Austurríki og Póllandi, eru stelpurnar okkar í fyrsta sinn í næsefsta styrkleikaflokki fyrir EM-dráttinn í dag.

Það ætti að gefa liðinu aukna möguleika á að komast upp úr sínum riðli og í 8-liða úrslit, þegar flautað verður til leiks í Sviss í júlí. Hér að neðan má sjá styrkleikaflokkana og mun Ísland fá einn mótherja úr flokki 1, einn úr flokki 3 og einn úr flokki 4.

Glódís Perla Viggósdóttir, Karólína Lea Vilhjálmsdóttir, Hildur Antonsdóttir og Diljá Ýr Zomers verða væntanlega í EM-hópnum næsta sumar og Vísir fékk þær til að setja hver um sig saman óskariðil sem og martraðarriðil, en það ræðst svo síðar í dag hvernig riðill Íslands mun líta út og þá hvort þeim verður að ósk sinni. 

Ljóst er að þær vilja helst gestgjafa Sviss úr efsta flokki en óttast mest, skiljanlega, heimsmeistara Spánar Ísland mun hins vegar sleppa við ríkjandi Evrópumeistara Englands sem eru í sama styrkleikaflokki og stelpurnar okkar.

Glódís: Gaman að spila opnunarleikinn

Draumariðill væri Sviss, Belgía og Wales. Það væri gaman að spila opnunarleikinn við Sviss og sleppa við stóru liðin úr þriðja styrkleikaflokki.

Martraðarriðill væri þá Spánn, Holland og Finnland eða Portúgal. Heimsmeistarar, fyrrverandi Evrópumeistarar og svo lið sem við höfum átt í erfiðleikum með undanfarið.

Karólína: Spánn með þær bestu og Portúgal vanmetið

Draumur: Sviss sem slakasta liðið úr potti 1. Belgía því við mættum þeim á síðasta EM og það var skemmtilegt að spila við þær. Finnland því það væri gaman að mæta einu af Norðurlöndunum. Við erum í góðum séns ef við mætum þeim á góðum degi.

Martröð: Spánn því þær eru rugl góðar, með bestu leikmenn heims innanborðs. Holland því það er frábært lið með marga spennandi leikmenn. Portúgal því það er mjög vanmetið lið og erfitt að spila við þær.

Hildur: Belgía hentar okkur

Draumur: Sviss því það er stemming að vera í sama riðli og heimaþjóðin og samkvæmt FIFA-listanum eru þær mun neðar en hin þrjú liðin. Belgía hentar okkar leikstíl svo það væri best að spila á móti þeim, og svo eru nokkrar stelpur þar sem voru með mér í Fortuna Sittard svo það væri gaman að mæta þeim. Wales því okkur hefur gengið ágætlega á móti þeim síðasta árið svo held það væri best að fá þær.

Martröð: Spánn. Mjög vel spilandi lið sem inniheldur nokkra af bestu leikmönnum heims. Væri erfitt að mæta þeim en gaman. Svíþjóð því Svíar standa sig alltaf vel á stórmótum. Þær eru mjög sterkar í föstum leikatriðinum en við erum það líka svo þetta yrði áhugaverður leikur. Portúgal því þær eru frekar líkar Spáni sem lið, margir hæfileikaríkir leikmenn og liðið vel spilandi.

Diljá: Til í leik við föðurþjóðina

Allt væri draumadráttur þar sem það væri draumur að fá að spila leik á EM.

En ef ég ætti að velja draumadrátt fyrir riðil á EM þá væri það Sviss, unnum þær í fyrra og eigum að geta gert það aftur, svo væri það Belgía þar sem það væri gaman að mæta liðsfélögum, og Wales þar sem við unnum einnig tvo góða sigra á móti þeim í fyrra.

Martraðardráttur væri svo Spánn (væri samt draumur samt að mæta besta liði heims) en svo myndi ég segja Holland eða Svíþjóð. Það eru bæði vel spilandi lið með mjög góða einstaklinga en væri samt gaman að mæta Hollandi þar sem ég er hálfhollensk [innsk.: pabbi Diljár er hollenskur] og á fjölskyldu og vini þar. Sama með Svíþjóð, væri einnig gaman að spila við þær þar sem ég myndi þá mæta mörgum gömlum liðsfélögum. Svo væri það Pólland, þegar Eva Pajor er heit þá eru þær erfiðar og myndu 100% vilja hefna fyrir töpin fyrr á árinu.