Á­fram full­komið hjá Liverpool í Meistara­deildinni

Liverpool hélt áfram sigurgöngu sinni í Meistaradeildinni eftir að liðið sótti sigur til Katalóníu í kvöld.

Liverpool vann þá 1-0 útisigur á Girona og hefur þar með unnið sex fyrstu leiki sína í Meistaradeildinni á þessari leiktíð.

Átján stig af átján mögulegum í húsi og markatalan er 13-1.

Með þessum sigri þá tryggði Liverpool sér sæti meðal átta efstu liðanna en þau lið sitja hjá í fyrstu umferð útsláttarkeppninnar.

Eina mark leiksins skoraði Mohamed Salah af vítapunktinum á 63. mínútu eftir að Luiz Diaz hafði fiskað vítið. Dómarinn dæmdi ekki strax en fór síðan í sjáinn eftir ábendingu frá myndbandsdómurum.

Liverpool er með fimm stiga forskot á Internazionale en ítalska liðið á leik inni seinna í kvöld.

Alisson Becker lék sinn fyrsta leik með Liverpool í langan tíma og varði nokkrum sinnum mjög vel frá heimamönnum. Hann þurfti fimm sinnum að taka á stóra sínum í leiknum en sannaði mikilvægi sitt þar.

Darwin Núnez byrjaði í framlínu Liverpool og fékk að venju nokkur dauðafæri en honum tókst ekki að skora.

Liverpool liðið fékk nóg af færum til að skora fleiri mörk en slapp líka nokkrum sinnum með skrekkinn þegar heimamenn settu smá pressu á liðið.

Á sama tíma fór fram leikur Dinamo Zagreb og Celtic í Króatíu. Hann endaði með markalausu jafntefli.