Til­einkaði sér hæg­læti og býr nú skuld­laust í sveitinni

Þetta er meðal þess sem fram kemur í Bítinu á Bylgjunni. Þar segir Þóra Hæglætishreyfinguna vera félagsskap fólks sem hafi tileinkað sér það að hægja aðeins á lífinu. Þetta sé fólk sem langi til að lifa á meðvitaðan hátt, velja hvernig það ver tíma sínum, hvernig það skapar samskipti sín, hvernig það annast sig sjálft og fólkið sitt.

Snýst allt um val

„Það getur allskonar komið upp og við förum öll í gegnum allskonar reynslu í lífinu en hvernig þú tæklar það, hvernig þú andar inn í mallann eða ekki ræður úrslitum um það hvernig þú kemst í gegnum það. Við höfum mjög mikið val og miklu meira val heldur en við höldum í upphafi.“

Þóra segir einstaklinga vera forritaða til að hegða sér á ákveðinn hátt. Fólk sé samt fyrst og fremst áhrifavaldar yfir eigin lífi og hafi alltaf val um hvaða afstöðu það taki til lífsins. Þannig sé hægt að horfa öðruvísi á hlutina heldur en að vera alltaf í viðbragðsstöðu, það sé hægt ða skipuleggja sig og draga úr spennu. Sjálf segist hún hafa breytt gríðarlega mörgum hlutum í sínu eigin lífi.

„Ég hef í gegnum mitt líf svona smám saman farið dýpra og dýpra inn í þessa hugmyndafræði. Fyrir sjö árum síðan þá ákváðum við maðurinn minn að flytja úr borginni í sveitina. Það er þáttur í þessari meðvituðu ákvörðun um að lifa hægara lífi, þannig við búum aðeins utan við höfuðborgarsvæðið.“

Hún segir þau hafa fest kaup á frístundarhúsi. Þau hafi losað sig við allan þann pakka sem hafi fylgt fyrra húsnæði í borginni.

„Við vorum eins og öll í að skulda rosa mikið og við losuðum okkur við það. Nú erum við allt að því skuldlaus og lifum tiltölulega þægilegu lífi að því leyti að við erum hætt að gera áætlanir um hvernig við eigum að greiða niður heldur hvenær verðum við komin með nóg til að kaupa. Fattiði. Þetta er grundvallarbreyting í mínu lífi, algjör grundvallarbreyting.“

Talar öðruvísi við manninn sinn

Sjálf segist Þóra í Bítinu vera stjórnunarfíkill í bata. Annað fólk hafi ekki lengur áhrif á hana með sinni hegðun auk þess sem Þóra segist með þessu læra hvernig hennar hegðun hafi áhrif á aðra.

„Ef ég er að reyna sífellt að hafa áhrif á annað fólk þá er ég alltaf að valda öðru fólki streitu. Með því að tileinka mér það að sjá að ég ætla ekki að láta annað fólk snúa mér á hvolf þá þarf ég líka að bera ábyrgð á því að vera ekki að snúa öðru fólki á hvolf.“

Hún segir þetta hafa skapað vellíðan í hennar nánasta umhverfi. Þóra nefnir sem dæmi að hún og eiginmaður hennar hafi tekið ákvörðun um að breyta sínum samskiptum. Það sé hægara gert en sagt að láta annað fólk ekki hafa áhrif á hana en það komi með æfingu.

„Við maðurinn minn ákváðum það fyrir nokkrum árum síðan að hætta að breyta hvort öðru. Það er bara ákvörðun. Nú elskum við allt í fari hvors annars, auðvitað ég segi það ekki við eigum alveg misjafna daga en þetta er ákvörðun. Og allt í sambandi við það hvernig þú lætur annað fólk hafa áhrif á þig er fyrst þitt. Fyrst og fremst.“

Á laugardaginn næsta stendur Hæglætishreyfingin fyrir viðburði þar sem höfundur bókarinnar Lifum lífinu hægar, Carl Honoré, heldur fyrirlestur um ávinning hæglætis. Skráning fer fram á www.haeglaeti.is.