Ómar Ingi ekki með á HM

Þetta kemur fram í tilkynningu frá Magdeburg þar sem segir að meiðsli Ómars á hægri ökkla valdi því að hann verði frá í um það bil þrjá mánuði. Hann mun þó ekki þurfa að fara í aðgerð vegna meiðslanna.

Ómar meiddist strax í annarri sókn Magdeburgar er liðið vann níu marka sigur gegn Bietigheim. Ómar sótti þá að vörn gestanna og lenti greinilega illa og snéri upp á hægri ökklann á sér. Hann var borinn af velli og kom ekki meira við sögu í leiknum.

Ísland hefur leik á HM þann 16. janúar næstkomandi þegar liðið mætir landsliði Grænhöfðaeyja.

Ómar hefur verið einn besti leikmaður heims undanfarin ár og þarf því ekki að fjölyrða um hversu mikill skellur þetta er fyrir Ísland í aðdraganda HM.