Ekki þörf enn á að stækka varnar­garða við Bláa lónið

„Gosið kom upp á ágætum stað en í hverju gosi þá eyðileggst eitthvað. Þetta er sjöunda eldgosið á einu ári og við venjumst þessu aldrei en í hverju gosi lærum við eitthvað nýtt. Núna var viðbragðstíminn stuttur og það mun kenna okkur eitthvað. Allt kerfi viðbragðsaðila gengur vel og það eiga allir mikið hrós skilið,“ segir Guðrún í samtali við fréttastofu. 

Hraun hefur þegar runnið yfir Grindavíkurveg, Norðurljósaveg, Bláalónsveg, rafmagnslínur til Grindavíkur og Njarðvíkuræðina sem flytur heitt vatn á Reykjanes. Ríkisstjórnin boðaði til aukafundar í dag vegna eldgossins en ekki hafði verið áætlað að funda á hefðbundnum tíma vegna kosningabaráttunnar sem nú stendur yfir.

Varnargarðarnir halda vel

Guðrún segir það hafa komið í ljós í þessu gosi hversu gagnlegir varnargarðarnir eru.

„Við sáum það við Bláa lónið í gær. Varnargarðurinn liggur beint við bílastæði fyrirtækisins. Það þurfti að loka skarði í varnargarðinum og því voru stórvirkar vinnuvélar að vinna í kapphlaupi við tímann. Við höfum séð það áður og það er stórkostlegt sjá kjarkinn og dugnaðinn í íslenskum jarðvinnuverktökum sem hafa verið að vinna þarna nærri sleitulaust í ár.“

Guðrún segir það ekki liggja fyrir hvort stækka þurfi varnargarðinn við Bláa lónið. Það verði metið eftir því sem líður á gosið hvort það þurfi að bæta ofan á hann.

„Við erum ekki komin á þann stað akkúrat núna.“

Skoða hvort hægt sé að koma upp nýjum leiðum

Hvað varðar Grindavíkurveginn segir Guðrún að hraunið hafi runnið yfir 600 metra kafla.

„Það er töluvert mikið. Norðurljósavegurinn sem liggur að Grindavíkurvegi, að Bláa lóninu og Northern Light inn, hann er líka farinn, þannig það er farin af stað vinna við að horfa til þess hvernig við getum komið upp öðrum leiðum. Það verður skoðað í dag og næstu daga.“

Þá sé einnig til taks kælibúnaður sem er í eigu íslenska ríkisins og geti hjálpað ef til þess kemur.

Guðrún segir að síðasta árið hafi farið fram ítarleg vinna til að tryggja íbúum heitt og kalt vatn. Það hafi verið leitað að heitu vatni í borholum auk þess sem það sé búið að tryggja íbúum kalt vatn á Suðurnesjum í Árnagerði ef það fer.

Rafmagn fór af í Grindavík þegar hraun rann yfir rafmagnslínur sem liggja þangað. Því er keyrt á varaafli þar og segir Guðrún að líklega verði ekki hægt að laga þær fyrr en eldgosinu lýkur.

Gott að láta heita vatnið renna

Þá segir Guðrún það gott að Njarðvíkuræðin haldi en eins og greint var frá í gær rann hraun yfir hana og gerir enn.

„Hún heldur og mér finnst mikilvægt að koma því á framfæri við íbúa á Reykjanesi að þeir ættu að láta heita vatnið renna. Það hjálpar, þá rennur meira í gegnum lögnina og eins ótrúlegt og það hljómar þá hjálpar það lögninni þegar hún er undir þessu álagi með nýtt hraun ofan á sér.“

Viðbragð erlendra miðla hófstilltara

Guðrún segir að Lilja Dögg Alfreðsdóttir, viðskipta- og menningarráðherra, hafi einnig á fundinum farið yfir viðbragð erlendra miðla við eldgosinu og ferðaþjónustunnar almennt.

„Það var hófstilltara viðbragð miðað við oft áður. Það var einnig meiri ró yfir ferðamanna því upplýsingagjöf til þeirra, og erlendra miðla, var hófstillt og góð. Það var hvergi panikk í greininni eða hjá þeim ferðamönnum sem hér eru staddir. Það virðist vera þannig að þegar ferðamenn eru að koma hingað núna þekki þeir það að eldgosin eru reglubundin og eru tiltölulega róleg yfir því.“

Hægt er að fylgjast með helstu vendingum er varða eldgosið í vaktinni hér að neðan.