Ný keppni FIFA sem enginn virðist vilja spila í

Tilkynnt var um dráttinn á samfélagsmiðlum sambandsins snemma í vikunni. 32 liðum verður skipt í átta fjögurra liða riðla. Tvö efstu komast áfram í 16-liða úrslit og líkir skipulaginu því til HM landsliða.

Keppnin hefur lengi verið Gianni Infantino, forseta FIFA, hugleikin en hann hefur talað fyrir því að FIFA taki meiri þátt í félagsliðaboltanum. Hugmyndin sé að stækka fótboltaheiminn og gefa stærstu liðum allra álfa tækifæri til að keppa hvort við annað.

Margur hefur gagnrýnt forsetann þar sem FIFA sé með þessu einfaldlega að reyna að eigna sér stærri sneið af köku alþjóðafótboltans. Yfirmenn hjá FIFA líti það hornauga að stærsta keppni heims sé Meistaradeild Evrópu en ekki keppni á vegum alþjóðasambandsins.

Nýja keppnin fer fram í Bandaríkjunum frá 15. júní til 13. júlí á næsta ári og verður ákveðin upphitun fyrir HM landsliða sem fram fer í Bandaríkjunum, Kanada og Mexíkó ári síðar.

Um er að ræða fyrsta mótið sinnar tegundar en í tæp 20 ár hafa aðeins sjö lið tekið þátt í HM félagsliða á vegum FIFA. Nýja keppnin á að vera á fjögurra ára fresti, líkt og landsliðamótið, og hefur sætt gagnrýni vegna aukins álags sem henni fylgir. Leikjum fjölgar sífellt á stærsta sviði fótboltans með fylgjandi álagi á leikmenn í fremstu röð.

Leikjaálagið gagnrýnt

FIFPro, samtök atvinnuknattspyrnumanna, hafa gagnrýnt áformin um HM félagsliða harðlega af þessum sökum, sem og World Leagues Forum, hagsmunasamtök atvinnumannadeilda. Samtökin tvö sendu sameiginlegt bréf til FIFA í síðasta mánuði þar sem sambandið var beðið um að færa keppnina á grundvelli velferðar leikmanna.

FIFA vísaði þeim áhyggjum á bug og sagði leikjaplanið hafa verið „vandlega íhugað“ til að veita leikmönnum nægan tíma til að jafna sig eftir skuldbindingar þeirra í deildarkeppnum sem eiga til að klárast í maí.

Þrátt fyrir þær skýringar alþjóðasambandsins er gagnrýnin töluverð. Auk samtaka hafa leikmenn og þjálfarar gagnrýnt hugmyndirnar. Þar á meðal Pep Guardiola, þjálfari Manchester City, sem benti á að í NBA-deildinni í körfubolta vestanhafs fái leikmenn til að mynda fjögurra mánaða frí á milli tímabila á meðan fótboltamönnum bjóðist þrjár vikur.

Lærisveinn Guardiola og besti leikmaður heims, Spánverjinn Rodri, hótaði í haust verkfalli vegna leikjaálags. Skömmu eftir að Rodri lét þau ummæli falla meiddist hann illa á hné í leik við Arsenal, þegar Manchester City var í mikilli leikjatörn.

Kærur víða af, fáir styrktaraðilar og enginn rétthafi

Um miðjan október komu samtök evrópskra fótboltadeila (European Leagues) ásamt FIFPro áleiðis kvörtun til Framkvæmdastjórnar Evrópusambandsins vegna meintrar misbeitingar valds af hálfu FIFA í tengslum við keppnina. Samtök atvinnumanna á Englandi (PFA) og samskonar samtök í Frakklandi (UNPF) skiluðu þá kæru til réttar í Brussel vegna HM félagsliða fyrr í ár.

Skýrleikinn er þá ekki mikill fyrir félögin sem taka þátt í keppninni. Enn er óljóst hvernig verðlaunafé verður ráðstafað og hversu mikið verður í boði. Ekki hefur verið samið við sjónvarpsrétthafa til að sýna mótið og aðeins einn styrktaraðili hefur verið opinberaður; kínverski rafvöruframleiðandinn Hisense.

Mótið hefst að öllu óbreyttu á Hard Rock-vellinum í Miami þann 15. júní og fátt virðist ætla að koma í veg fyrir að Gianni Infantino opinberi nýja barnið sitt fyrir heiminum. Hvernig mótið svo fer fram og hversu mikið stjörnurnar í stóru liðunum spila verður svo að koma í ljós.